fbpx

Qeveria e Gjibraltarit: Ndeshjen Lincoln-Prishtina e anuloi UEFA

Qeveria e Gjibraltarit ka konfirmuar të shtunën në mbrëmje se ishte UEFA ajo që mori vendimin për anulimin e ndeshjes mes Lincolnit e Prishtinës në fazën parakualifikuese për Ligën e Evropës, pasi tetë futbollistë të Prishtinës rezultuan pozitivë në testet për COVID-19.

Në një sqarim pas anulimit të ndeshjes, Qeveria e Gjibraltarit ka thënë se bazuar në rregullat ndërkombëtare, rregulli për izolim është i qartë dhe vlen për ata që kanë rezultuar pozitivë dhe që kanë qenë në kontakt me rastet pozitive.

Kjo qeveri ka thënë se, si vend nikoqir, ka informuar autoritetet e UEFA-s se bazuar në këto rregulla, ekipi mysafir duhet të vetizolohet “dhe për këtë arsye, UEFA ka vendosur që ndeshja të mos zhvillohej”.

“Nuk do të ishte e përgjegjshme ose në përputhshmëri me rregullat e pranuara ndërkombëtarisht për izolimin për ata që kanë rezultuar pozitivë (ose ata që kanë qenë në kontakt të afërt me ta), që autoritetet e Gjibraltarit t’u jepnin leje anëtarëve të Prishtinës që nuk kanë rezultuar pozitivë të jenë në kontakt me të tjerët sot. Siguria është primare”, thuhet në njoftimin e Qeverisë së Gjibraltarit.

Në reagim tutje theksohet se për të gjitha çështjet tjera sa i përket ndeshjes, përgjegjësia i mbetet UEFA-s. Kjo qeveri ka shtuar se po mbledh informata se me kë kanë pasur kontakt lojtarët e Prishtinës për të parandaluar shpërndarjen e virusit.

Kjo s’ishte hera e parë që ndeshja Lincoln-Prishtina u anulua. Fillimisht takimi ishte paraparë të zhvillohej në mesjavë, por ishte shtyrë pasi tetë futbollistë të Prishtinës rezultuan pozitivë për koronavirus. Fituesi i Kupës së Kosovës ndërroi tërësisht skuadrën në tentativën që të zhvillohej ndeshja dhe me futbollistë të tjerë u nis drejt Gjibraltarit me skuadër të përbërë nga futbollistë të ekipeve tjera kosovare. Në testimet e reja, sërish tetë futbollistë rezultuan pozitivë.

Prishtina ka hedhur dyshime në testet në Gjibraltar, ndërsa nga UEFA ende s’ka ndonjë njoftim zyrtar se çka do të ndodhë me këtë ndeshje.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.