Prej të mërkurës rezultatet e testeve publikohen në orën 15

Ministria e Shëndetësisë në Kosovë ka njoftuar se që nga data 15 korrik, njoftimet për rastet e reja të të infektuarve dhe viktimave nga COVID-19, do të bëhen publike në ora 15:00.

“Po në këtë komunikim, çdo ditë do të jepen edhe të dhënat për numrin e pacientëve të shtrirë në Shërbimin Spitalor dhe Klinik Universitar të Kosovës dhe njësitë e tij- spitalet e përgjithshme, gjendjen shëndetësore të pacientëve si dhe karakteristika të tjera me interes rreth ecurisë klinike të Covid-19 në Kosovë”, thuhet në komunikatën e ministrisë së Shëndetësisë.

Deri më tani, njoftimet e Institutit të Shëndetësisë Publike (IKSHPK) janë shpallur çdo ditë, në orët e vona të mbrëmjes.

Ndërkohë IKSHPK ka bërë të ditur se gjatë ditës së sotme (e martë), në Laboratorin e Mikrobiologjisë molekulare, janë duke u testuar rreth 400 mostra të marra për koronavirusin e ri.

“Rezultatet e këtyre mostrave do të publikohen gjatë ditës së nesërme”, thuhet në njoftim.

Në Qendrën Klinike Universitare të Kosovës dhe 7 spitalet e përgjithshme: Prizren, Gjakovë, Pejë, Ferizaj, Gjilan, Mitrovicë dhe Vushtrri janë të hospitalizuar 460 pacientë.

“Prej tyre, 306 pacientë janë të konfirmuar me Covid-19 nga të cilët 217 pacientë janë me oksigjenoterapi dhe 11 të intubuar”, thuhet në njoftimin të ministrisë së Shëndetësisë.

Sipas të dhënave nga Instituti Kombëtar i Shëndetësisë Publike të Kosovës, që nga regjistrimi i rasteve të para me koronavirus më 13 mars e deri më 13 korrik, janë regjistruar në total 5,118 raste.

Prej tyre, 108 pacientë kanë vdekur, 2,370 janë shëruar, ndërsa raste aktive vazhdojnë të jenë edhe 2,640.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

error: Content is protected !!