Obama ka një apel për rininë e planetit

Ishujt dhe vendet e varfra bregdetare që përballen me efektet më të rënda të ndryshimeve të klimës, janë “thirrja morale për pjesën tjetër të botës” që të ndërmarrë veprime të menjëhershme, tha ish-presidenti i Shteteve të Bashkuara, Barack Obama, në një konferencë për liderët e rinj në kryeqytetin e Malajzisë, Kuala Lumpur, të organizuar nga Fondacioni “Obama”.

Vendet ishuj që mund të zhduken për shkak të rritjes së niveleve të detit, të enjten, akuzuan vendet e pasura për humbjen e interesimit ndaj urgjencës së krizës klimatike.

Në Madrid të Spanjës, përfaqësues të të gjitha vendeve të botës, po diskutojnë për çështjen e klimës në kuadër të një samiti dy-javor të organizuar nga Kombet e Bashkuara.

“Zëri juaj, për atë që po ndodh këtu dhe tani, është një thirrje morale për pjesën tjetër të botës. Është e rëndësishme të gjeni mënyra për të treguar atë që po e shihni dhe humbjet që po ndodhin”, tha ish-presidenti, Barack Obama.

Shtetet e Bashkuara nënshkruan Marrëveshjen e Parisit më 2015 gjatë presidencës së Obamës, duke premtuar një ulje prej 26-28% të emetimeve deri në vitin 2025.

Por, administrata e presidentit amerikan, Donald Trump, javën e kaluar paraqiti planet për t’u tërhequr nga pakti.

Marrëveshja e Parisit synon të shmangë skenarët më katastrofikë të parashikuar nga shkencëtarët e klimës, duke kufizuar rritjen e temperaturave mesatare globale të shkaktuara nga djegia e karburanteve fosile.

Obama tha se i takon të rinjve në botë të drejtojnë akuzat për trajtimin e ndryshimeve të klimës, duke fajësuar gjeneratën e mëparshme për dështim në trajtimin e kësaj çështjeje.

“Oqeanet do të rriten dhe kjo do të zhvendosë njerëzit. Kështu që ne do të duhet të parashikojmë dhe të kujdesemi për disa nga pasojat, përfshirë migrimet”,tha Obama.

Javën e shkuar, shefi i Kombeve të Bashkuara, Antonio Guterres, u bëri thirrje ekonomive të mëdha botërore, të bëjnë angazhime më serioze për të ulur emetimet e gazrave serë.

“Ne kemi nevojë që emituesit e mëdhenj të kuptojnë se roli i tyre është thelbësor, sepse nëse emituesit e mëdhenj dështojnë, gjithçka do të dështojë”, tha Guterres në një intervistë për Reuters.

Çështja e ndryshimeve klimatike po diskutohet në një samit të Kombeve të Bashkuara, që po mbahet në Spanjë.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.