Grenell në Prishtinë: Fuqizimi ekonomik, kjo është mantra a administratës së z. Trump

Ambasadori amerikan në Berlin, Richard Grenell, i dërguar i posaçëm i presidentit Donald Trump për bisedimet e paqes ndërmjet Kosovës dhe Serbisë, tha të mërkurën në mbrëmje në Prishtinë se nuk do të ndërhyjë në debatet e brendshme politike për formimin e qeverisë së Kosovës.

Ai i bëri këto komente sot në Prishtinë ku u takua me presidentin e Kosovës Hashim Thaçi, që është edhe takimi i tij parë në kuadër të vizitës që po zhvillon në Kosovë ku të enjten do të takojë edhe përfaqësues të tjerë politik, para se të shkojë në Beograd.

Ambasadori Grenell tha se “presidenti Trump është veçanërisht i përqendruar për zgjidhjen e këtij problemi (dialogut mes Kosovës dhe Serbisë) , jo duke shikuar prapa, ose duke parë bllokada e duke dëgjuar argumentet e vjetra. Ne duam që rajon , Kosova dhe Serbia të shënojnë progres në frontin ekonomik. Të rinjtë kanë nevojë për vende të punës. Kjo është mantra e administratës së z. Trump. Ne kemi shpërthim ekonomik në SHBA, sepse ishim në gjendje t’i themi pushtetit të zbrapset për t’i lënë hapësirë bizneseve që të lulëzojnë. Ishim në gjendje t’i themi pushtetit të zbrapset e t’i lejojë njerëzit të kenë pushtet (të fuqizohen)”.

“Çfarë unë mundohem të bëjë është të shtyjmë disa çështje, projekte të ndryshme. Kemi ide, të cilat do t’i shtyejmë dhe të cilat do të krijojnë energji të reja, shtyetje ekonomike dhe në veçanti vende pune me pagesë të mirë”, tha ambasadori Grenell.

Përqëndrimi në planin ekonomik, tha ai, është në fokus të administratës së presidentit Trump.

“Pra kjo nevojitet, zhvillim ekonomik”, tha Grenell, duke shtuar se kjo është kërkesë edhe e presidentit Trump.

“Kjo është arsyeja pse kam ardhur këtu, nuk do të përfshihem në diskutimet politike. Unë dëshiroj që të avancojnë edhe Kosova e edhe Serbia, në një drejtim të një kuptimi më të gjërë të punës së përbashkët”, tha ai.

Ambasadori Grenell filloi vizitën në rajon dy ditë pasi bashkë më këshilltarin e Sigurisë Kombëtare, Robert O’Brien, ndërmjetësoi një marrëveshje ndërmjet Kosovës dhe Serbisë për rihapjen e linjës ajrore Prishtinë – Beograd, në një përpjekje për përmirësimin e lidhjeve ekonomike midis dy vendeve.

Ai tha në Prishtinë se Shtetet e Bashkuara do të nxisin “të dyja qeveritë dhe udhëheqësit në Kosovë dhe Serbi që të fillojnë të ecin përpara me krijimin e vendeve të punës. Komuniteti i biznesit në Shtetet e Bashkuara dhe komuniteti i biznesit në Evropë duan të vijnë në këtë rajon. Por nuk mund ta bëjnë këtë nëse ka konflikt nga establishmenti politik. Ajo që po përpiqem të bëjë është të shohim përpara dhe të çojmë përpara një gamë projektesh dhe idesh për punë të paguara mirë”.

Presidenti i Kosovës, Hashim Thaçi, falënderoi zotin Grenell dhe presidentin Trump për marrëveshjen rreth linjës linjës ajrore Prishtinë – Beograd.

“Mendoj që është diçka e re, ajo që të tjerët nuk kanë arritur ta bëjnë është duke e bërë ambasadori Grenell dhe administrata e Shteteve të Bashkuara të Amerikës. Roli i SHBA-së në këtë proces është i jashtëzakonshëm dhe i pazëvendësueshëm. Kam besim të plotë se nën lidershipin e presidentit Trump do të arrijmë deri te marrëveshja finale në mes të shtetit të Kosovës dhe Serbisë, e kjo do t’i ndihmojë shumë zhvillimit ekonomik, progresit, paqes dhe stabilitetit”, tha ai.

Zoti Grenell u emërua më 4 tetor në detyrën e re, pak kohë pasi që sekretari amerikan i shtetit, Mike Pompeo kishte emëruar zotin Mathew Palmer si përfaqësues të posaçëm për Ballkanin.

Emërimi i tyre, ndonëse kishte nxitur pikëpyetje ndër shumë vëzhgues, u mirëprit në Kosovë ku roli i Shteteve të Bashkuara vlerësohet i pazëvendësueshëm në të gjitha proceset politike.

Vizita e tij në Kosovë ndodhë në një periudhë kur vendi ende nuk ka një qeveri të re pas zgjedhjeve të parakohshme parlamentare të 6 tetorit.

Ambasadori Grenell tha se nuk do të përfshihet në debate politike.

Presidenti Thaçi, tha ndërkaq se ‘ambasadori Grenell është i ngarkuar special për normalizimin e marrëdhënieve Kosovë-Serbi nga presidenti Trump, nuk është për çështje të brendshme dhe lokale politike këtu sikur që nuk janë diplomatët këtu që të interferojnë apo të bëjnë presion qoftë edhe ambasadorë në Prishtinë në çështje të brendshme dhe lokale sepse është e drejtë e secilës parti të zgjedh partnerin prandaj ne do të diskutojmë për dialogun, do të diskutojmë për çështjet që janë jetike të konsolidimit të shtetit të Kosovës dhe të kultivimit të përjetshëm të relacioneve në mes të Prishtinës dhe Washingtonit. Kështu që është jashtë agjendave lokale dhe elektorale kjo vizitë por është agjendë e planifikimit të shtyrjes përpara të dialogut për çka kom besim. Përsëri e ritheksoj se me lidershipin e presidentit Trump do t’ia arrijmë”, tha presidenti Thaçi.

Mandatin për themelimin e qeverisë e mori në fillim të javës kryetari i lëvizjes Vetëvendosje, një parti politike që ishte kritike e rreptë e mënyrës se si janë zhvilluar bisedimet e ndërmjetësuara nga Bashkimi Evropian për normalizimin e marrëdhënieve Kosovë – Serbi.

Këto bisedime janë pezulluar që nga nëntori i vitit 2018 kur Prishtina u vuri tarifa prej 100 për qind mallrave serbe në shenjë kundërshtimi ndaj fushatës së Beogradit kundër shtetësisë së Kosovës.

Beogradi kushtëzon rifillimin e bisedimeve me heqjen e tarifave, ndërsa qeveria e deritashme e udhëhequr nga Ramush Haradinaj, i ka rezistuar trysnisë amerikane dhe evropiane për pezullimin apo heqjen e tyre.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

error: Content is protected !!