Ballina / TEKNOLOGJI / Facebook gjobitet nga Britania
Facebook gjobitet nga Britania

Facebook gjobitet nga Britania

Facebook-u do të përballet me gjobën e tij të parë pas skandalit me “Cambridge Analytica”, për shkak se platforma e mediave sociale e lejoi firmën britanike të kishte qasje tek informacionet private të miliona përdoruesve, pa pëlqimin apo dijeninë e tyre.

Një zyrë hetimore e qeverisë britanike, ajo e Komisionerit të Informacionit (ICO), e gjobiti Facebook-un me 500 mijë paund ose 663 mijë dollarë, shuma maksimale që mund të vendoset për shkelje të ligjeve britanike të privatësisë mbi të dhënat. Në një raport, ICO zbulonte se Facebook kishte thyer ligjin duke mos mbrojtur të dhënat e rreth 87 milionë përdoruesve të prekur nga shkelja e sigurisë.

Hetimi i ICO-s arriti në përfundimin se Facebook-u “e shkeli ligjin duke dështuar në mbrojtjen e informacionin të përdoruesve”. Sipas gjetjeve të raportit kompania dështoi të ishte transparente rreth asaj se si u “volën” të dhënat e përdoruesve në platformën e saj, nga të tjerë.

“Cambridge Analytica”, një firmë në Londër, u mbyll në muajin maj, pas njoftimeve në shtyp për krijimin e “mjeteve që mund të identifikojnë personalitetet e votuesve amerikanë dhe të ndikojnë në sjelljen e tyre”.

Ndërkohë ndaj Facebook-ut po kryhen hetime të mëtejshme nga agjenci të tilla si Byroja Federale amerikane e Hetimeve si dhe Komisioni i Letrave me Vlerë dhe Shkëmbimeve. Në muajin prill, themeluesi i Facebook-ut Mark Zuckerberg doli përpara një komisioni të Senatit amerikan për të dëshmuar mbi veprimet e kompanisë lidhur me skandalin. /VoA

@Fluidi

Provo po ashtu

Qendra për Kontrollin dhe Parandalimin e Sëmundjeve thotë se vetëvrasjet përbëjnë një ndër 10 shkaqet kryesore të vdekjeve në Shtetet e Bashkuara. Dy adoleshentë kanë gjetur një mënyrë për të zvogëluar shkallën e vetëvrasjeve, falë një aplikacioni që përdoret në telefonat inteligjentë. Korrespondetja e Zërit të Amerikës Mariama Diallo bisedoi me shpikësit e tij, motër e vëlla, të cilët kohët e fundit u nderuan me një çmim nga shoqata amerikane jofitimprurëse e Shëndetit Mendor. Lajmi i vetëvrasjes së personalitetit televiziv Anthony Bourdain si dhe stilistes së famshme Kate Spade, tronditën mbarë botën. Ngjarjet ndodhën në të njëjtën kohë kur Qendra për Kontrollin dhe Parandalimin e Sëmundjeve publikoi një raport që dëshmonte një rritje me 25 për qind të vetëvrasjeve në Shtetet e Bashkuara që nga viti 1999. "Të dhënat tregojnë qartë se problemi po përkeqësohet dhe ajo që nevojitet është parandalimi i vetëvrasjeve", thotë Deborah Stone e Qendrës për Kontrollin e Sëmundjeve. Charlie dhe Hannah Lucas, motër e vëlla, janë krijuesit e aplikacionit "NotOK", një mjet dixhital për të ndihmuar në trajtimin e problemit. "Aplikacioni “NotOK” është në thelb një buton paniku dixhital, që kur shtypet dërgon një mesazh me shkrim që thotë: “Nuk jam mirë! Më telefononi, më shkruani ose hajdeni këtu!”, thotë Charlie Lucas bashkëkrijues i aplikacionit. Mesazhi shkon tek një grup i parazgjedhur personash, deri në 5 kontakte të ngushta, së bashku me vendndodhjen e dërguesit të tij. Krijuesit e aplikacionit mbrritën tek kjo ide ndërsa Hannah luftonte me një sëmundje që i shkaktonte gjendje të fikti. "Quhet sindromi postural ortostatik i takikardisë. Në thelb më shkakton gjendje të fikti. Kam humbur ditë të tëra shkolle për këtë shkak, pasi isha gjithmonë ai fëmija i sëmurë, që kishte takime me mjekun, ndodhej në urgjencë, merrte serume, bënte analiza gjaku, gjithçka", thotë Hannah Lucas bashkëkrijuese e aplikacionit. Hannah thotë se shpesh kishte qenë viktimë e bullizmit në shkollë për shkak të gjendjes së saj. "Kisha gjithmonë frikë. Situata mbrriti në një pikë kur kisha frikë të largohesha nga krevati. Nisa të vuaj nga depresioni dhe ankthi, situata ishte vërtet shqetësuese, kisha çrregullime të ngrënies, dëshirë për të lënduar veten dhe përpjekje të shumëfishta për vetëvrasje. Ishte e tmerrshme", thotë ajo. “Kam qenë i paaftë ta ndihmoj për një kohë të gjatë sepse sa herë që ajo binte, unë nuk mund të isha atje, nuk mund ta dërgoja tek doktori, nuk mund të bëja asgjë për të. Pasi më rrëfeu idenë e saj, thashë pse jo… dhe po atë ditë krijova prototipin e aplikacionit", thotë Charlie Lucas. Aktualisht gjendja e Hannës është më e mirë. Ajo thotë se aplikacioni nuk është vetëm për parandalimin e vetëvrasjes, por mund të përdoret nga të gjithë ata që nuk ndihen mirë. "Pavarësisht asaj që po kaloni, duhet t’i ruani lidhjet me njerëzit, sepse izolimi i vetes thjesht do t'i bëjë gjërat më keq", thotë Hannah. Charlie dhe Hannah Lucas kanë fituar disa çmime për aplikacionin, përfshirë një të marrë së fundmi nga organizata amerikane jofitimprurëse e Shëndetit Mendor. Që nga dita që doli në përdorim për publikun e gjerë aplikacioni është shkarkuar më shumë se 15 mijë herë.

Një aplikacion që shpëton jetë

Qendra për Kontrollin dhe Parandalimin e Sëmundjeve thotë se vetëvrasjet përbëjnë një ndër 10 shkaqet …

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *

Ky sajt përdor Akismet-in për të pakësuar numrin e mesazheve të padëshiruara. Mësoni se si përpunohen të dhënat e komentit tuaj.