Cameron fitoi zgjedhjet, Miliband jep dorëheqje

Rezultatet përfundimtare në zgjedhjet e përgjithshme të Mbretërisë së Bashkuar, kanë zyrtarizuar fitoren e konservatorëve që do të drejtohet edhe për një mandat nga kryeministri David Cameron.

Konservatorët kanë fituar terren kryesisht në Angli dhe Uells dhe nga të dhënat e fundit të BBC rezulton se kanë siguruar 326 vende, 1 më shumë se gjysma e deputetëve të Parlamentit, duke gëzuar mazhorancën.

Dhe Cameron nuk ka vonuar të tregojë vizionin e tij, në një takim me mbretëreshën Elisabeth. “Vizioni i qeverisë time do të jetë zhvillimi ekonomik”, ka thënë ai në takimin me monarken.

Më herët Cameron deklaroi se do të vazhdojë me synimet e tij për të mbajtur një referendum mbi qëndrimin ose jo të Britanisë në Bashkimin Evropian dhe për të përmbushur planin ekonomik të konservatorëve.

“Synimet e mia mbeten të qarta, të qeveris në bazat e qeverisjes për këdo që jeton në Mbretërinë tonë të Bashkuar. Sepse unë dua ta mbaj vendin të bashkuar, duke implementuar sa më shpejt ato premtime për të cilat u bashkuam me partitë e tjera në Uells dhe Skoci”, tha Cameron.

Ai u kthye në Downing Street i shoqëruar nga bashkëshortja e tij Samantha. “Unë e dua partinë time dhe shpresoj që qeveria që do të doja të udhëheq të ruajë mantelin e fitores, mantelin e Një Kombi, Një Mbretërie të Bashkuar. Kjo është mënyra se si do të qeveris nëse do kem fatin të formoj një kabinet në ditët e ardhshme”, shtoi ai.

Kurse burime të afërta nga Ed Miliband deklarojnë se lideri i laburistëve ka dhënë dorëheqjen pasi partia e tij dështoi në këto zgjedhje, edhe në Skoci përballë SNP-së.

Edhe liberal-demokrati Nick Clegg ka njoftuar një veprim të tillë, pasi partia e tij doli shumë e tkurrur nga këto zgjedhje, nga 57 në 8 ulëse në Parlament.

Poashtu edhe lideri i UKIP ka bërë të njëjtën gjë  i cili në disa zona që konsideroheshin bastione të tij humbi përballë konservatorëve.