Category Archives: BOTA

SHBA: Kongresi formalisht e ka certifikuar fitoren e Trumpit

Kongresi i Shteteve të Bashkuara e ka certifikuar fitoren e Donald Trumpit në zgjedhjet presidenciale amerikane, më 8 nëntor të vitit të kaluar.

Mbrëmë, në një seancë të përbashkët të Kongresit, ligjvënësit i llogaritën dhe i konfirmuan votat e Kolegjit Elektoral, sipas të cilave presidenti i zgjedhur republikan, Donald Trump, ka trimufuar kundër rivales demokrate, Hillary Clinton.

Inaugurimi i zotit Trump bëhet më 20 të këtij muaji.

“Donald Trump nga Nju Jorku ka fituar 304 vota për president”, u tha ligjvënësve, zëvendëspresidenti aktual, Joe Biden, pas kompletimit të llogaritjes.

Ish-sekretarja amerikane e shtetit, Hillary Clinton, që në një mënyrë ishte favorite për të fituar në këto zgjedhje, por pësoi disfatë të vështirë nga Donald Trump, i cili praktikisht është fillestar në politikë, i ka fituar 227 vota në Kolegjin Elektoral.

Urdhërin për të ndikuar në zgjedhjet e SHBA e dha Presidenti Putin

Raporti i ri i agjencive amerikane të zbulimit, që u bë publik të premten, arrin në përfundimin se ishte Presidenti Vladimir Putin ai që e dha urdhërin për të ndikuar në zgjedhjet presidenciale në Shtetet e Bashkuara.

Raporti, i bërë publik vetëm disa orë, pasi presidenti i zgjedhur Donald Trump u informua mbi të, thekson se shërbimet ruse të zbulimit kanë kryer sulme kibernetike kundër objektivave që lidhen me zgjedhjet e vitit 2016 dhe që përfshijnë të dyja partitë politike.

“Sipas vlerësimit tonë, presidenti Putin dhe qeveria e Rusisë, kishin një preferencë të qartë për presidentin e zgjedhur Trump”, thuhet në raport.

“Po ashtu ne vlerësojmë se presidenti Putin dhe qeveria e Rusisë synuan të ndihmojnë zgjedhjen e presidentit Trump duke diskredituar, ku të ishte e mundur kandidaten Klinton dhe duke e krahasuar atë në mënyrë të pafavorshme me zotin Trump”, shkruhet në raport.

Ndër gjetjet e tjera:

Presidenti Putin ka patur përvoja të shumta pozitive pune me udhëheqës perëndimorë, interesat ekonomike të të cilëve, i kanë bërë ata më të gatshëm të punojnë me Rusinë.

Fushata e Moskës për të ndikuar, pasoi strategjinë e Rusisë, duke kombinuar operacionet e fshehta, si sulmet kibernetike, me përpjekjet e hapura të agjencive qeveritare ruse, të shtypit të financuar nga shteti, të ndërmjetësve të tretë dhe përdoruesve të paguar të medias sociale.

Pas ditës së zgjedhjeve, raporti thekson se zbulimi rus filloi të bëjë objekt të sulmeve kibernetike punonjës të qeverisë amerikane dhe individë të lidhur me institucionet studimore dhe organizatat jo-qeveritare në fushën e sigurisë kombëtare dhe të politikës së jashtme.

Ato që u bënë të njohura përmes WikiLeaks, thotë raporti, nuk përmbanin falsifikime të dukshme.

Raporti thekson se “kemi shumë besim se është GRU, shërbimi i zbulimit rus të ushtrisë, që ia ka dhënë WikiLeaks, materialet e marrë nga Komiteti Kombëtar Demokrat dhe zyrtarët e lartë demokratë”.

Sipas raportit, një numër diplomatësh rusë ishin përgatitur për të vënë publikisht në dyshim vlefshmërinë e rezultateve.

Raporti prej 25 faqesh, thotë se në bazë të aktivitetit të mediave sociale të Moskës, blogerët pro-Kremlinit kishin përgatitur një fushatë në Twitter të quajtur #DemocracyRIP për natën e zgjedhjeve, sepse parashikonin që Hillary Clinton do të fitonte.

Raporti thotë se përpjekjet ruse për të ndikuar në zgjedhjet presidenciale pasqyrojnë shprehjen më të fundit të dëshirës së vjetër të Moskës për të minuar sistemin liberal demokratik të udhëhequr nga SHBA.

Aty thuhet se qëllimi i aktiviteteve të Rusisë ishte dukshëm më intensiv në krahasim me operacionet e mëparshme.

LEXO EDHE:

Trump: Sulm i ri kundër komunitetit të inteligjencës amerikane

Fjalimi i Michelle Obamës emocionon të rinjtë

Michellle Obama e pati të vështirë të përmbante emocionet në fjalimin e lamtumirës në Shtëpinë e Bardhë.

Me zërin që i dridhej dhe dukshëm e mallëngjyer, bashkëshortja e presidentit në largim teksa foli për një plate të rinjsh, tha se eksperienca si Zonjë e Parë kishte qenë nderi më i madh i jetës së saj.

“Dua që të rinjtë tanë ta dinë se kanë shumë rëndësi, i përkasin këtij vendi. Kështu mos kini frikë, më dëgjuat! Tregohuni të vendosur dhe me shpresë. Fuqizojeni veten përmes arsimit të mirë dhe më pas ndihmoni në krijimin e një vendi që t’ia vlejë”, tha Michelle.

Ceremonia e nisur nga Obama në 2015-n, vlerëson këshilltarët shkollorë që janë përpjekur të motivojnë dhe udhëzojnë studentët gjatë kolegjit. Gjatë qëndrimit të saj në Shtëpinë e Bardhë, arsimimi dhe kujdesi për trupin kanë qenë mes temave të preferuara të Zonjës së Parë.

Edhe pse Michelle do të ketë shfaqje të tjera në publik, deri në fund të mandatit, ai i së premtes ishte fjalimi i fundit i mbajtur në Shtëpinë e Bardhë. Presidenti i zgjedhur Donald Trump do të marrë zyrtarisht detyrën në 20 janar.

Sulm në Florida, të paktën 5 të vrarë

Ka shkuar në pesë numri i të vrarëve nga të shtënat në Aeroportin ndërkombëtar të Floridës.

Mediat amerikane bëjnë me dije se autori i sulmit është 26-vjeçari Esteban Santiago. Ai kishte mbërritur me avion nga Alaska në Florida dhe armën e kishte të futur një çantë bashkë me bagazhet e tjera, dhe e kishte kaluar zyrtarisht në aeroport.

Sipas  burimeve të mediave amerikane, 26-vjeçari pasi ka marrë çantën ku kishte armën ka shkuar në tualet dhe e ka mbushur atë. Pas këtij momenti ai ka dalë dhe ka qëlluar ndaj personave të tjerë.

26-vjeçari Esteban Santiago rezulton si një person i diagnostikuar me probleme mendore në të kaluarën, por raportohet se ai ishte në mjekim të vazhdueshëm.

Raportohet se 26-vjeçari  ka debatuar me pasagjerët e tjerë gjatë fluturimit para se të merrte armën dhe të qëllonte ndaj kujtdo që i dilte përpara.

Esteban Santiago prej disa vitesh jetonte në Alaska ku ka edhe një grua e një vajzë 4-vjeçare.

Pas sulmit, Policia evakuoi aeroportin duke bllokuar të gjitha daljet e tij. Sulmi rezultoi me 5 të vrarë e 8 të plagosur.

Deri më tani raportohet të jenë së paku nëntë persona të tjerë të lënduar.

***

Një numër personash janë vrarë nga të shtënat me armë zjarri nga një sulmues me armë në aeroportin Fort Lauderdale, tha të premten një zyrtar i SHBA-së, ka njoftuar CNN.

Disa njerëz u vranë dhe një person është arrestuar tha zyra e policisë në Broward, përmes postimit në Twitter.

Zyrtarë të aeroportit thanë në rrjetin social Twitter se “kishte një incident” në zonën e bagazheve në Terminalin 2.

Njoftime të ndryshme në mediat sociale – përfshirë edhe publikimin në twitter të ish zëdhënësit të Shtëpisë së Bardhë, Ari Fleischer, përshkruan të shtënat.

Një stacion televiziv i Miamit ka postuar në tëitter pamjet duke pohuar se ato janë regjistruar nga pjesa e brendshme e teminalit të bagazheve, njofton BBC..

Në video shihen disa të plagosur të shtrirë në tokë derisa dëshmitarët e tjerë thërrasin për ndihmë.

Guvernatori i Floridas Rick Scott po udhëton drejt aerportit për t’u njoftuar me zhvillimin nga forcat e sigurisë.

Në nëntor të vitit 2016, afro 2.5 milionë udhëtarë kaluan përmes aerportit Fort Laderdale, kanë njoftuar autoritetet qeveritare.

SHBA, agjencitë e zbulimit informojnë presidentin e zgjedhur

Presidenti i zgjedhur Donald Trump, i cili ka hedhur poshtë idenë se Rusia ka ndërhyrë në zgjedhjet presidenciale të nëntorit, do të marrë sot një informacion të plotë nga krerët e komunitetit amerikan të zbulimit.

Zoti Trump ka mbajtur qëndrim tepër kritik ndaj agjencive të zbulimit, diçka e pazakontë për një president të zgjedhur, edhe pse dje ai e zbuti pak tonin.

Ndërkaq, drejtori i shërbimeve amerikane të zbulimit thotë se është më i bindur se kurrë që Rusia ka përdorur sulmet kibernetike për të ndikuar në zgjedhjet presidenciale.

Ai paralajmëroi zotin Trump të mos bëjë komente nënvlerësuese ndaj agjencive të zbulimit.

Kritikat e matura, por të pazakonta nga drejtori i shërbimeve të zbulimit James Clapper në një seancë me pyetje-përgjigje të zhvilluar dje në Senat, janë një tjetër dëshmi e fërkimeve mes presidentit të ardhshëm dhe specialistëve që shërbejnë si sytë e veshët e Amerikës:

“Mendoj se publiku duhet të informohet sa të jetë e mundur mbi këtë temë,” shprehet Drejtori i Shërbimeve të Zbulimit James Clapper para senatorëve, ku tha se raporti i administrates Obama mbi piraterinë kibernetike ruse do të lëshohet javën e ardhshme dhe nuk do të lërë dyshime për synimet e Moskës që të ndikonte në zgjedhjet amerikane.

“Kjo ishte një fushatë zgjedhore me shumë elementë. Pirateria kibernetike ishte vetëm një prej tyre; përveç saj u shoqërua me propagandë, dizinformim dhe lajme të sajuara,” tha zoti Clapper.

“Kundërshtarët tanë kanë arritur në përfundimin se përfitimet për sulme kundër Amerikës janë më të mëdha se sa çmimi që do të paguajnë,” thotë John McCain.

Senatori McCain kryeson Komisionin e Senatit për Shërbimet e Armatosura. Ai i ka cilësuar si akt lufte sulmet kibernetike ruse, duke shtuar se Shtetet e Bashkuara e lejuan këtë situatë, pasi nuk po tregoheshin vigjilente.

“Për momentin nuk kemi një vijë politike, apo strategji. Nuk kemi një përgjigje ndaj këtyre sulmeve”.

Dje Donald Trump komentoi në Twitter se është “simpatizant i fortë” i shërbimeve të zbulimit. Por presidenti i zgjedhur ka vënë në pikëpyetje nevojën për seanca informimi mbi faktet e mbledhura nga këto shërbime, ka folur për gabime të CIA-s në të kaluarën dhe disa herë ka hedhur poshtë përfundimet e agjencive inteligjente se Rusia ishte pas piraterisë kibernetike gjatë zgjedhjeve.

“Kush përfiton kur personi që do të bëhet komandant i përgjithshëm flet me përçmim për shërbimet e zbulimit,” pyet Senatorja demokrate Claire McCaskill.

“Mendoj se ekziston dallim mes skepticizmit dhe nënvlerësimit,” shprehet zoti Clapper.

“Ato që bëjmë ne, në masë jo të vogël marrin shtysë nga besimi që kanë udhëheqësit e vendit tek ne. Pa këtë besim… nuk do të doja që të ballafaqohemi me një skenar ku specialistët tanë vendosin të dorëhiqen nga postet e tyre,” thotë Admirali Michael Rodgers i Komandës Kibernetike Amerikane.

Në Kongres po shtohen impulset dypartiake për ndëshkime më të forta kundër Rusisë.

“Nuk ka dyshim, asnjë dyshim se rusët ndërhynë, sulmuan dhe vodhën informata dixhitale dhe më pas i përdorën si armë kundër Shteteve të Bashkuara, prandaj duhet të vendosim sanksione edhe më të rënda,” thotë Senatori demokrat Richard Blumenthal.

“Nuk ka diskutim që rusët e ndërmorën sulmin këtë herë; por herën tjetër mund të jenë iranianët apo kinezët. Këtë radhë u sulmuan demokratët, herën tjetër mund të sulmohen republikanët nëse nuk e ndalim këtë përpjekje,” thotë senatori republikan Lindsey Graham.

Ky qëndrim dypartiak ndaj sulmeve kibernetike nuk gjen jehonë në komentet e presidentit të zgjedhur Trump, i cili ka ngritur idenë se përfundimet e agjencive të zbulimit mund të jenë frymëzuar nga motive politike.

Pas skepticizmit që ai ka shprehur për muaj me radhë nuk pritet që sesioni i sotëm informues me shërbimet e zbulimit të arrijë t’ia ndryshojë rrënjësisht mendimin zotit Trump.

Turqi: 18 persona ndalohen lidhur me sulmin në Izmir

Ministria e Drejtësisë në Turqi tha se autoritetet kanë ndalur 18 persona që kanë të bëjnë me sulmin në Izmir. Sulmi la të vdekur një polic dhe një punonjës të gjykatës.

Ministri i Drejtësisë Bekir Bozdag, shpalosi detaje nga hetimet në ceremoninë e varrimit të policit të vrarë në sulmin me bombë, për të cilin autoritetet deklaruan se ishte kryer nga militantët kurdë.

Asnjë organizatë nuk ka marrë përgjegjësinë për sulmim. Kurdët kanë kryer disa sulme kundër forcave turke në vitin e fundit.

Po ashtu edhe Shteti Islamik ka kryer disa sulme vdekjeprurëse në Turqi.

Lëvizje armatimesh në Evropë

Anije të ngarkuara me tanke amerikane, artileri vetëlëvizëse dhe qindra automjete luftarake arritën sot në një port të Gjermanisë veriore në rrugën drejt Evropës Lindore, sipas agjencisë së lajmeve Associated Press.

Armatimet dërgohen me synimin për të forcuar aftësitë e NATO-s përballë një agresioni të mundshëm rus.

Gjatë dy javëve të ardhshme, rreth 3,500 trupa të një divizioni këmbësorie në Fort Karson të Kolorados do t’u shtohen pajisjeve luftarake që arritën sot në port.

Kjo shënon fillimin e një faze të re të operacionit me emrin “Atlantik Resolve”, i cili parashikon praninë e vazhdueshme të një brigate të blinduar amerikane në Evropë, mbi bazën e një rotacioni nëntë-mujor.

Trupat dhe pajisjet do të dislokohen së pari në Poloni dhe pastaj do të përhapen në shtatë vende, nga Estonia në Bullgari, ku është rritur nervozizmi lidhur me shtimin e operacioneve ushtarake ruse në rajon. Një njësi që do të shërbejë si shtab ushtarak do të vendoset në Gjermani.

Trump: Meksika do të na paguaj për murin

Presidenti i zgjedhur Donald Trump tha sot në Twitter se Meksika do të rimbursojë taksapaguesit amerikanë për një mur të ri kufitar dhe se paratë e shpenzuara nga Shtetet e Bashkuara do të jenë për “hir të shpejtësisë.”

Komentet bëhen ndërkohë që ndihmësit kryesorë të zotit Trump marrin në shqyrtim një plan për t’i kërkuar Kongresit të garantojë se në buxhet ekzistojnë fondet për ndërtimin e murit.

Sipas dy anëtarëve të Kongresit dhe një ndihmësi të ekipit të tranzicionit të zotit Trump, të cilët kërkuan të mos identifikohen, ndërtimi i mundshëm i murit do të mbështetej në një ligj ekzistues, i cili autorizon vendosjen e barrierave dhe të teknologjive të tjera përgjatë kufirit jugor.

Zoti Trump tha sot në një koment në Twitter se “mediat e pandershme – siç i quajti ai – nuk raportojnë se çdo para e shpenzuar për ndërtimin e Murit të Madh (për hir të shpejtësisë), do të paguhet më vonë nga Meksika”.

Presidenti i Meksikës dhe zyrtarë të tjerë të lartë meksikanë këmbëngulin se Meksika nuk do të paguajë për murin.

Austri: Kurz po e harton projektligjin për ndalimin e shamive

Ministri i jashtëm austriak, Sebastian Kurz ka thënë të premtën se ai dëshiron t’iu ndalojë shërbyesve civil, përfshirë edhe mësueseve që të mbajnë shami islamike, raporton Reuters.

Kurz është duke punuar në një projekt ligj për këtë së bashku me Muna Duzdar, një nga ministret e qeverisë që vjen nga social demokratët, prejardhja familjare e të cilës është myslimane.

Nëse projekt ligji miratohet në parlament, ndalimi në tërë shtetin do të jetë më strikt se ai që tashmë ekziston në Francë.

Në muajin mars, një këshilltar i Gjykatës Evropiane të Drejtësisë kishte thënë se kompanitë në Evropë duhet lejuar që të ndalojnë stafin të mbajnë shamitë myslimane, por vetëm si pjesë të një ndalimi të përgjithshëm të simboleve fetare, pra jo vetëm atyre islamike.

Kryediplomati austriak, Sebastian Kurz ka thënë se kryqi dhe simbole të tjera të krishtera nuk do të jenë të ndaluara, pas miratimit të ligjit.

Kurz është duke punuar që të ristrukturojë ligjet e integrimit dhe krahas shamisë islamike ai dëshiron të ndalojë edhe shpërndarjen e librit të shenjtë të myslimanëve, Kuranit nga myslimanët salafistë.

Turqia po e rishqyrton qasjen e koalicionit amerikan në bazën e rëndësishme ajrore

Zyrtarët turq kanë lënë të kuptohet se ata mund t’ia ndalojnë koalicionit të udhëhequr nga SHBA-ja që po e lufton grupin militant, Shteti Islamik, që ta përdorë bazën e rëndësishme ajrore turke, Inxhirlik, afër kufirit me Sirinë.

Koalicioni e ka përdorur këtë bazë për kryerjen e sulmeve ajrore kundër IS-it, derisa milicitë aleate kurde janë duke u përballur në betejë me luftëtarët e Shtetit Islamik.

Por, për Turqinë, grupi kurd në kuadër të këtij koalicioni është organizatë terroriste sepse ata kanë lidhje me separatistët kurdë që janë në luftë me Turqinë.

“Ne duhet ta themi se përdorimi i bazës Inxhirlik nga aleatët e NATO-s po vihet në pikëpyetje nga populli turk. Prandaj, kjo çështje është në agjenden e qeverisë. Natyrisht, marrëveshjet ndërkombëtare duhet të verifikohen. Duhet thënë sinçerisht: nëse ekziston një organizatë terroriste e njohur nga të gjithë, përfshirë edhe ne, ajo duhet luftuar së bashku”, ka thënë zëvendëskryeministri turk, Vejsi Kajnak.

Ai është ankuar se koalicioni e ka përdorur rrallë bazën Inxhirlik për t’i ofruar përkrahje Turqisë derisa ajo po lufton kundër grupit, Shteti Islamik bashkë me aleatët e saj, grupet rebele Sunnite.

Zëdhënësi i presidences turke si dhe ministri i mbrojtjes dhe ai i jashtëm kanë shprehur qëndrime të përafërta gjatë kësaj jave, duke thënë se Turqia e ka ngritur këtë çështje edhe me presidentin e zgjedhur amerikan, Donald Trump, me shpresën se ai do e ndryshojë qasjen amerikane.

Ankesa turke ka nxitur Pentagonin dhe Shtëpinë e Bardhë të jap garanci të fuqishme gjatë ditëve të fundit se Ankaraja mund të mbështetet në përkrahjen e aeroplanëve amerikanë në përballjen kundër grupit, Shteti Islamik përreth qytetit sirian, Al Bab.

Duke reaguar ndaj këtij lajmi, zëdhënësi i Departamentit amerikan të Mbrojtjes, kapiten Jeff Davis, gjatë një interviste më 4 janar ka thënë:

“Ju e dini që Inxhirliku është shumë i rëndësishëm. Në jemi në bazën Inxhirlik prej disa vitesh. Natyrisht, kjo prani daton para luftës kundër ISIS (Shteti Islamik). Ajo është një bazë strategjike e rëndësishme jo vetëm për operacionet në Siri dhe Irak, por edhe për mbrojtjen e Evropës, gjithashtu. Ne kemi kuptuar se mundësia për të qenë aty është një avantazh strategjk, por kjo nuk ka të bëjë vetëm me SHBA-në”.

“Mos harroni, ky është koalicion. Aty bëjnë pjesë edhe shtete të tjera që gjithashtu e përdorin Inxhirlikun. Ne po e përdorim për mbrojtje nga ISIL (emër tjetër për Shtetin Islamik), dhe kjo është diçka për të cilën SHBA-ja dhe Turqia kanë pajtim të plotë”, ka thënë Davis. (A.H)