Ballina / KOSOVA / BE kërkon pezullimin e procesit të përzgjedhjes së noterëve; Kundërshton Tahiri
drejtesia , KGJK
KGJK

BE kërkon pezullimin e procesit të përzgjedhjes së noterëve; Kundërshton Tahiri

BE kërkon pezullimin e procesit të përzgjedhjes së noterëve, por këte kërkesë të Bashkimit Evropian, e kundërshton Ministri i Drejtësisë në ikje, Abelard Tahiri.

Zyra e BE-së në Kosovë ka reaguar lidhur me procesin e përzgjedhjes dhe emërimit të noterëve të rinj të Kosovës. Kjo Zyrë kërkon që Qeveria në largim të mos marrë vendim në këtë proces dhe thotë se i njëjti vendim duhet t’i lihet Qeverisë së re.

“U bëjmë thirrje autoriteteve në largim të Kosovës të përmbahen nga emërimi i çdo noteri, sepse ne besojmë fuqishëm që vendimi në këtë drejtim duhet t’i lihet qeverisë së re”, ka përfunduar Zyra e BE-së në Kosovë.

Zyra e BE-së thotë se mbështet palëkundshëm Profesionet e Lira Ligjore në Kosovë dhe në këtë drejtim, thotë se ka mbështetur autoritetet lokale dhe këto profesione drejtpërdrejt për t’i forcuar ato për kah numri dhe statusi i tyre.

“Procesi i përzgjedhjes dhe emërimit të rregullt dhe të ligjshëm të noterëve është thelbësor për të nxitur besimin që shoqëria u jep individëve që luajnë këtë rol të përgjegjshëm. Për rrjedhojë, ky proces duhet të jetë i lirë nga çdo pretendim për parregullsi, qofshin ato pretendime të vërteta apo të perceptuara”, ka theksuar Zyra e BE-së në reagimin e saj.

Ditë më parë, procesi i përzgjedhjes së noterëve nga Ministria e Drejtësisë, përveç reagimeve në Kosovë, ka nxitur edhe reagimin e përbashkët të Unionit Ndërkombëtar të Noterëve dhe të Odës Federale Gjermane të Noterisë.

Ministri në largim i Drejtësisë, Abelard Tahiri, ka deklaruar se emërimi i noterëve të rinj do të marrë epilog legjitim në harmoni të plotë me ligjin dhe në partneritet të plotë me Oden e Noterëve të Republikës së Kosovës.

“… sot, përballë ftesës së Zyrës së BE-së për pezullimin e emërimit të noterëve të rinj, si Ministër i Drejtësisë vlerësoj se emërimi i noterëve të rinj, mbi formulën që është paraparë si e domosdoshme dhe emergjente për të përmbushur nevojat e qytetarëve, veçmas komuniteteve jo shumicë, është tërësisht legjitim dhe duhet të ndodhë”, ka thënë Tahiri në një komunikatë të dërguar nga Ministria e drejtësisë.

Tahiri thotë se procesi i emërimit të noterëve të rinj është pjesë e reformës së sistemit noterial që ka nisur qysh më 2018.

“Reforma e sistemit noterial ka nisur që në fillim të vitit 2018. Bashkë me BE-në dhe në përputhje me standardet e Bashkimit Evropian, kemi hartuar dhe Kuvendi i Republikës së Kosovës ka miratuar Ligjin e ri për Noterinë. Në kuadër të zbatimit të ligjit të ri dhe formulës së re 1 Noter në 10 Mijë banorë, në prill të këtij viti, shumë kohë para se të dorëhiqej qeveria e Kryeministrit Haradinaj, kemi analizuar nevojat e qytetarëve dhe kemi shpallur konkursin publik për rekrutimin e noterëve të rinj. Rënia e qeverisë e ka gjetur procesin pothuajse të përfunduar. Pra, nuk ka qenë një reformë që e kam nisur aty për aty, por një reformë e domosdoshme që është nisur dhe është zhvilluar përgjatë dy viteve të fundit”, ka thënë më tej Tahiri.

Ai thotë se në fazën e rekrutimit, secili hap në këtë proces është bërë në përputhje të plotë me Ligjin dhe aktet përcjellëse dhe se testimi i kandidatëve është bërë në Akademinë e Sigurisë Publike nën vëzhgimin e kamerave, ndërsa testi është përpiluar nga anëtarët e Komisionit Profesional, vetëm një orë para mbajtjes së provimit.

“Në përputhje me rrethanat, anëtarët e Komisionit për Dhënien e Provimit të Noterisë kanë shmangur konfliktin e interesit, gjë që është konfirmuar tashmë nga institucioni kompetent për këtë çështje, Agjencia Kundër Korrupsionit me opinionin që kanë dorëzuar tashmë pranë Ministrisë së Drejtësisë”, deklaron ministri në largim i Drejtësisë, Abelard Tahiri.

Ai shton se lidhur me pretendimet për parregullsitë eventuale, “ne kemi pritur palë të interesuara, përfshirë Ambasadorë nga vendet e Bashkimit Evropian, të cilëve ua kemi sqaruar në detaje rrethanat dhe ecurinë e këtij procesi”.

“Prandaj, sot, përballë ftesës së Zyrës së BE-së për pezullimin e emërimit të noterëve të rinj, si Ministër i Drejtësisë vlerësoj se emërimi i noterëve të rinj, mbi formulën që është paraparë si e domosdoshme dhe emergjente për të përmbushur nevojat e qytetarëve, veçmas komuniteteve jo shumicë, është tërësisht legjitim dhe duhet të ndodhë. Për më tepër, secili nga kandidatët që është testuar dhe ka kaluar fazat e provimit, ka fituar një të drejtë ligjore të cilën unë nuk mund ta hedhë poshtë në mënyrë arbitrare. Një veprim i tillë, do të ishte mesazhi më i rëndë për sundimin e ligjit”, thekson Tahiri.

Tutje, ai tha se është punuar shumë që të vendosen standarde të mirëfillta të barazisë para ligjit dhe mos cenimit të së drejtës së individëve të lirë të kësaj shoqërie që përfitojnë statusin e tyre në mënyrë legjitime dhe mbi bazën e ligjit.

“Ky postulat i domosdoshëm, nuk është subjekt i ujdive politike të askujt dhe të asgjëje. Nuk ka asnjë garanci, as nevojë dhe as arsye që një proces i tillë i nisur dhe realizuar në mënyrë legjitime, të lihet anash e të mos marrë epilog, së paku për ato raste që janë emergjente. Për njohuri të opinionit publik, dëshiroj të sqaroj se ky proces do të marrë epilog legjitim në harmoni të plotë me ligjin dhe në partneritet të plotë me Oden e Noterëve të Republikës së Kosovës”, përfundoi Tahiri.

Provo po ashtu

TCH: Lëvizja e lirë është ide që gëzon mbështetjen e të gjithë partnerëve të shqiptarëve

Ideja e lëvizjes së lirë të njerëzve dhe mallrave mes Shqipërisë dhe Kosovës është e …

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.