Avioni me futbollistë brazilianë rrëzohet në Kolumbi

Avioni me futbollistë brazilianë rrëzohet në Kolumbi
Një avion me 81 udhëtarë, përfshirë edhe një ekip të futbollit brazilian që po udhëtonte për në Kolumbi për një turne rajonal, u rrëzua gjatë rrugës për në aeroportin ndërkombëtar Medellin.

Autoritetet e aviacionit thanë se raportohet për gjashtë të mbijetuar.

“Kjo është një tragjedi i përmasave të mëdha”, tha kryetari i Medellinit, Federico Gutierrez, derisa po udhëtonte për në zonën malore jashtë qytetit ku është rrëzuar avioni.

Autoritetet e aviacionit thanë se avioni britanik Aerospace 146 që po shfrytëzohej nga kompania ajrore boliviane Lamia, shpalli gjendjen e emergjencës në orën 10 të darkës sipas kohës lokale (ora 4:00 sipas kohës së Evropës qendrore) për shkak të një defekti elektrik.

Autoritetet thanë se ekipet e shpëtimit u aktivizuan menjëherë, por një helikopter i forcave ajrore u detyrua të kthehet për shkak të pamjes shumë të kufizuar.

Avioni që bëri një ndalesë në Santa Cruz të Bolivias, po transportonte ekipin e futbollit Chapecoense nga Brazili jugor. Ekipi pritej të luante të mërkurën kundër Atletico Nacional të Medellinit, në kuadër të ndeshjeve për Kupën e Amerikës së jugut.

Në avion ndodheshin 72 udhëtarë dhe nëntë anëtarë të ekuipazhit. Një radio lokale tha se avioni i njëjtë kishte transportuar ekipin kombëtar të Argjentinës për një ndeshje më herët gjatë këtij muaji në Brazil.

Ekipi nga qyteti i vogël Chapeco arriti në ligën e parë të Brazilit më 2014, për herë të parë që nga vitet 70-ta dhe arriti në finalen e Kupës së Amerikës së Jugut, pasi mundi javën e kaluar ekipin legjendar të Argjentinës, San Lorenzo.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

error: Content is protected !!