fbpx

Arrestohet Dardan Molliqaj

Lëvizja Vetëvendosje thotë se sot, rreth orës 09:20, në Aeroportin e Prishtinës, sekretarit të VV-së Dardan Molliqajt, i është ndaluar udhëtimi për në Zvicër, ku është arrestuar nga Policia e Kosovës.

Sipas VV-së Molliqaj po dërgohet në njërin prej stacioneve policore në Prishtinë.

Derisa kjo Lëvizje shpreh shqetësim dhe reagon fuqishëm ndaj këtij arrestimi.

“Dhuna policore e ushtruar më 27 janar, arrestimet masive të qytetarëve pas kësaj proteste, dhuna psikologjike e ushtruar para protestës së 18 prillit, kërcënimet ndaj mësimdhënësve grevistë, dhe së fundi arrestimi i Dardan Molliqajt, flasin për përpjekjen e vazhdueshme të Qeverisë që t’i shtypë dhunshëm protestat qytetare”, thotë Vetëvendosje.

Më tej VV thotë se Qeveria, në vend që të merret seriozisht me kërkesat e drejta të qytetarëve protestues dhe t’i plotësojë ato, po i arreston protestuesit duke e vazhduar kështu përndjekjen e kërcënimin ndaj qytetarëve, në mbrojtje të shtetit të kapur.

Lëvizja Vetëvendosje kërkon me ngulm që Dardan Molliqaj të lirohet menjëherë si dhe paralajmëron Qeverinë që me metoda të tilla represive nuk do të arrijë shtypjen e pakënaqësisë së madhe të qytetarëve, thuhet ne njoftim./infoglobi/