Mustafa- kryetarëve të degëve: Dilni në terren
08 / 02 / 2013, 16:54
Kryetari i Lidhjes Demokratike të Kosovës (LDK), Isa Mustafa, sot ka mbajtur takimin e rregullt me kryetarët e degëve të LDK-së, si dhe ka mbledhur Kryesinë e partisë.
Në të dy takimet është diskutuar për fillimin e përgatitjeve për procesin e zgjedhjeve lokale në Kosovë.
Kryetari ka propozuar formimin e disa mekanizma, të cilët do të ndihmojnë dinamizimin e punës në të gjitha degët e LDK-së, me qëllim të garantimit të një procesi të drejtë zgjedhor, si dhe për të sensibilizuar elektoratin e LDK-së dhe qytetarët në përgjithësi për të votuar LDK-në në mënyrë sa më masive.
Në funksion të dinamizimit të punëve, kryetarët e degëve do të punojnë në terren në baza ditore, ndërsa takimet e kryetarit Mustafa me drejtuesit e degëve dhe me qytetarët do të jenë edhe më të shpeshta.
Kryetari i LDK-së ka kërkuar punë dhe përkushtim, që LDK-ja të jetë parti e parë në zgjedhje, që të drejtojë komunat e vendit, për të rikthyer sundimin e ligjit dhe mirëqenien e qytetarëve të Kosovës.
Po ashtu, kryetari Mustafa ka kërkuar që të rinjtë dhe femrat të përfshihen sa më shumë në këtë proces dhe që strukturat e degëve të LDK-së të krijojnë hapësirë për të gjithë ata që duan të punojnë me LDK-në, për qëllimin e përbashkët, fitoren në zgjedhje.
