Ju flet Fisi…

10 / 02 / 2013, 13:16

• Tweet
• Shpërndaje

Në intervistën dhënë Info Globit, Fisnik Ismaili aktivist i Lëvizjes Vetëvendosje dhe themeluesi e Drejtori Kreativ i ‘Ogilvy | Karrota’ në Kosovë, flet për pikëpamjet e tij personale lidhur me zhvillimet politike dhe ekonomike në vend. Ismaili ka mbi 17 vjet përvojë pune, shtatë prej të cilave ka punuar për kompanitë prestigjoze të dizajnit në Londër, Britani e Madhe, si udhëheqës kreativ, duke prodhuar website dhe punë kreative shtypi për një numër të madh klientësh si Cisco Systems, Apple Europe, British Airways, Barclays Bank, Mattel and Channel 4.Veprimtaria e tij e viteve të fundit në rajon përfshin krijimin e Monumentit të Pavarësisë NEWBORN, fushatën e njohur “Duaje tënden”, si dhe punë për klientë si Z mobile, AMC, PTK, KEK, Albtelecom, Tetra Pak, Raiffeisen Bank, British Airways, Bashkia e Tiranës, Kuvendi i Kosovës, AmCham Kosovë, British American Tobacco, Kraft Foods, Gillette/Braun, Sesame Street, Snoop Dogg dhe shumë të tjera.Fisniku është i diplomuar në degën Multimedia nga Universiteti i Westminster, Londër, Britani e Madhe, dhe gjithashtu është fitues një numër çmimesh ndërkombëtare për dizajn dhe reklama, përfshi Luanin e Artë në Cannes, Clio të Argjendtë, Eurobest të Argjendtë dhe Golden Drum Grand Prix.Është autori i publikimit të mirënjohur dhe kontraverzal online, The Pimpsons, si dhe bashkëthemelues i portalit satirik, Banalisti.

Intervistoi: Evliana BERANI

InfoGLOBI: A besoni në Kosovën shtet?
Ismaili: Po, normal se besoj në Kosovën shtet. Për këtë ditë kanë ëndërruar dhe kanë dhënë jetën shumë njerëz. Unë vetë jam rritur me dëshirën të bëhemi shtet, edhepse jam përkrahës i madh i Bashkimit Kombëtar. Por, besoj në Kosovën shtet vetëm ashtu si një shteti i takon të jetë: i fortë, funksional dhe stabil, e jo me problemet që i ka tani, pa sovranitet, pa ushtri, pa ekonomi, pa ulëse në OKB, e me plot probleme tjera.

Edhe pse me këtë pavarësi të brishtë, produkt i pakos e Ahtisarit, e me gjithë mangësitë që i ka, ne si shtet duhet patjetër të punojmë shumë, të funksionojmë si duhet dhe t’i ndryshojmë shumë gjëra, për ta realizuar bashkimin kombëtar, i cili është i pashmangshëm.

InfoGLOBI: Kosova në vazhdimësi konsiderohet ‘shtet i brishtë’. Pse është e tillë, dhe deri kur do të mbetet e brishtë?
Ismaili: Sepse, prej paslufte s’është bërë gati asgjë nga të gjitha partitë që e provuan pushtetin, aq sa nuk u bë asgjë nga eksperimenti ndërkombëtar, i quajtur UNMIK. E, për t’u bërë edhe më keq, pak para shpalljes së pavarësisë, në pushtet erdhi një grup njerëzish një klikë mafioze, e cila nuk interesohet fare as për vendin, as për qytetarin, por vetëm për përfitime personale. Më këtë pushtet edhe me këtë mënyrë të udhëheqjes së shtetit, jo vetëm se nuk do të përparojmë, por jemi duke u kthyer prapa nga disa vjet, për çdo ditë që kjo bandë vazhdon të jetë në pushtet.

Prej paslufte, e posaçërisht këto 6 vjetët e fundit, që gati për çdo ditë po del nga një skandal i ri, produkt i kësaj bande, që vetëmse po betonon bindjen se këta janë në pozita kryekëput për përfitime personale, pa çarë asnjëherë kokën për mirëqenien e qytetarëve.

InfoGLOBI: Kur jemi te mirëqenia qytetare, është krijuar perceptimi se ajo rangohet e fundit nga të gjithë subjektët politikë, e jo vetëm tek partitë në pushtet. Çka kishit bërë ju si aktivist në Lëvizjen Vetëvendosje, po të ishit në pushtet? Si do ta rikthenit njeriun dhe interesat e tij në epiqendër të politikave shtetërore?
Ismaili: Ka shumë gjëra që duhen për t’u bërë edhe s’po di prej cilës t’ia filloj. Së pari, duhet angazhuar në luftën kundër korrupsionit dhe instalimin e një sistemi të mirëfilltë të drejtësisë, sepse hajnia është ajo që po e stagnon vendin më së shumti në çdo fushë. Paratë që po vidhen pandërprerë i takojnë investimeve në arsim, shëndetësi, ekonomi, prodhimtari dhe çdo sferë tjetër të doemosdoshme për zhvillim të mirëfilltë, e jo xhepave të një grupi të caktuar njerëzish, të cilët fatkeqësisht sot po na e udhëheqin shtetin.

Nuk pajtohem kur thua se edhe Lëvizja Vetëvendosje futet në mesin e subjekteve që injorojnë qytetarin dhe mirëqenjën e tij. Përkundrazi, nuk ka ditë që nuk ngrisim zërin pikërisht për çështjet që prekin atë: për papunësinë, për arsimin dhe shëndetësinë e degraduar, që janë vetëm disa prej brengave të shumëta që i mundojnë njerëzit. Tjetër është që nuk na dalin të gjitha aktivitete nëpër media. E, duke qenë se shumë po kontrollohen prej vetë qeveritarëve, e posaçërisht RTK, këto fokusohen kryesisht duke u munduar të na paraqesin sa më negativisht: herë si rrugaçë, herë si jokombëtarë, e herë si anti-amerikanë, gjithherë duke e shtrembëruar të vërtetën, prej të cilës kanë shumë frikë.

InfoGLOBI: Prej një subjekti politik njeriu pret vepra konkrete. P.sh ju po e përmendni korrupsionin, shtrohet pyetja sa dosje ose ankesa i ka ngritur Vetëvendosja deri sot kundër personave konkret në pushtet apo jashtë pushtetit në lidhje me korrupsionin?
Ismaili: Janë disa raste që kemi ngritur edhe padi, edhepse nuk e di saktë se sa nga to janë ekzekutuar nga institucionet përgjegjëse. Por, meqë ne nuk e kemi pushtetin, është e vështirë t’i detyrojmë prokurorët të mirren me luftë kundër korrupsionit, kur vetë sistemin e drejtësisë e kontrollon qeveria aktuale, duke e bërë të pamundur të ndiqen raste të shumta penale.

Ne jemi të vetmit që publikuam kontratën e Qeverisë me Bechtel & Enka për autostradën, në të cilën çmimet e materialit ndërtimor janë 3 herë më të shtrenjta sesa ato në treg, që është hajni klasike. Kaq mund të bëjmë në këto rrethana. Qeveria jo vetëm që nuk e ka publikuar këtë kontratë sot e kësaj dite, por asnjë prokuror s’e ka çuar këtë më tutje, që tregon se çfarë ndikimi ka pushteti nëpër institucione.

Sidoqoftë, ne prapëseprapë vazhdojmë të jemi më të zëshmit në denoncimin e shumë padrejtësive ndaj qytetarëve, rasteve korruptive edhe vendimeve në dëm të interesave shtetërore që i bëjnë këta në pushtet. Posaçërisht kur ato vazhdimisht “shukaten” ose “zhduken” , si nga gjykatat, ashtu edhe nga mediat.

Ju po harroni se ne kemi vetëm 12 ulëse në Kuvend. Çka mund të bëhet më shumë nga ajo që kemi bërë ne si VV, me vetëm 12 deputetë në Kuvendin e Kosovës, kur çështjet që i ngrisim në Kuvend nuk marrin vota të mjaftueshme? Shpesh ka ndodhur që edhe partitë tjera opozitare të mos na përkrahin për çështje të rëndësishme, sepse ose janë të ndikuara nga banda në pushtet, ose nuk duan që as atyre t’u preken interesat personale, e në raste vetëm për të mos na lënë meritat për një nismë të caktuar, që tregon se edhe këto kanë agjenda të fshehura, të cilat i kanë më të rëndësishme se mirëqenia e qytetarëve.

E ne, edhepse jemi forca e dytë opozitare, shpesh konsiderohemi si zëri i vetëm i opozitës. Si të tillë, kemi ngritur shumë çështje në Kuvend, të cilat më herët as nuk janë përmendur nga politika e vjetër, pra, nga partitë që deri tash kanë patur rast që së paku një herë të jenë në pushtet. Për mua, me rëndësi është se ne jemi gjithmonë në anën e qytetarit edhe e di se gjithmonë do iu dalim krah, pavarësisht se a jemi në pushtet apo në opozitë.

InfoGLOBI: Nuk mendova vetëm për parlamentin…Nga opozita nuk priten vetëm fjalë. Priten veprime konkrete. Bie fjala, ajo përgatitë dosje dhe ia parashtron prokurorisë. Pas ofrimit të fakteve edhe debatet e saj në parlament do të ishin më kredibile. Kështu si po zhvillohen punët në Kosovë, çdo gjë po përfundon në nivel të akuzës, kritikës së paargumentuar, që dikush e konsideron shpifje e dikush e beson si të vërtetë…
Ismaili: Ju kuptoj, por si mund të hetohet korrupsioni, kur nuk ka prokurori e as sistem gjyqësor të pavarur? Ne vazhdimisht paraqesim dëshmi dhe e di se, pavarësisht nga rrethanat, VV ka bërë më shumë se të gjitha subjektet e tjera politike bashkë, në demaskimin e sjelljeve korruptive në Kosovë.

LDK-ja, bie fjala, me vite të tëra nuk ka bërë ndonjë gjë konkrete që vlen të përmendet, pos kur i ndihmoi Presidentes Jahjaga të vendoset ku është, edhe tash i bie pishman, sepse nuk po respektohet marrëveshja që e kanë bërë me Thaçin dhe ish-ambasadorin e SHBA-ve, Chris Dell.

Në anën tjetër AAK-ja brenda natës ndryshoi qëndrimet, vetëm e vetëm për tu futur në koalicion, përkatësisht në pushtet, me mendje për të siguruar postin e Kryeministrit të Kosovës. Unë s’e kam idenë çka e shtyu Ramush Haradinajn (lideri i AAK-së) të negocijojë me Hashim Thaçin (Kryeministër), duke i ditur marrëdhëniet e tyre të mëhershme? Nuk thehen parimet vetëm për t’u futur në pushtet.

Në fund, po del se Thaçi ia “lujti lojën” edhe Haradinajt, ashtu si ia “lujti” Isa Mustafës me Presidenten, e edhe disa bashkëpartiakëve, të cilët po arrin t’i nxjerrë edhe nga strukturat e vetë partisë, duke i bërë të duken të luhatshëm.

Kjo tregon se Vetëvendosje gati tërë kohën është e vetme në angazhimin për çrrënjosjen e korrupsionit edhe luftën kundër dukurive të tjera negative. Dhe nuk ka ditë që nuk e denoncojmë një rast korruptiv apo që nuk dalim me ndonjë aksion për të iu kundërvënë dëmeve që po ia shkakton Kosovës pushteti aktual.

Ju po e shihni edhe vetë se gati për çdo ditë po dalin afera e skandale të reja të korrupsionit dhe gënjeshtrave. Rasti me Ministrinë e Bajram Rexhepit, me milionat e tenderit për pasaportat biometrike, është vetëm njëri nga më të “nxehtit” kohëve të fundit. Pastaj skandali i përgjimeve “Pröntö” dhe gjuha e mafiozëve që flasin ndryshe në publik, e ndryshe kur janë larg syve të qytetarit, që është hipokrizi e kulluar.

E këto s’janë vetëm akuza pa fakte, si po i quani ju, por afera dhe skandale të evidentuara. Në një vend normal, vetëm skandali i përgjimeve kishte mjaftuar që qeveria e atij shteti të jepte dorëheqje menjëherë. Këtu aferat e fëlliqëta s’po kanë mbarim, edhe në fund prapë e dëgjon ministra e zyrtarë duke thënë se nuk e kanë ndërmend të japin dorëheqje, përkundër gjithë atyre fakteve për keqpërdorime.

Të gjitha këto tregojnë se po na udhëheq një pushtet diktatorial. Një pushtet që i shantazhon dhe tmerron vazhdimisht qytetarët e vetë. Unë shoh shumë njerëz të frikësuar, të cilët s’guxojnë as të flasin lirshëm në vendin e tyre, e kjo s’është liria për të cilën është luftuar dhe njerëz kanë rënë dëshmorë. Më ka ndodhë të takoj njerëz që, qysh prej kyçjes time në Vetëvendosje, mu kanë shmangë, duke mos dashur që t’ia prishin vetes punët.

InfoGLOBI: Ju besoni se pushteti është ai që mundet me ushtru ndonjë formë të represionit në njerëz që kontaktojnë me Vëtëvendosjen? Po ju keni zyrë në vend publik, njerëzit marrin pjesë në tubimet e juaja publike…
Ismaili: Po, shumë njerëz marrin pjesë nëpër tubime e tribuna, edhe numri i përkrahësve vazhdimisht po rritet. Por, ka edhe qytetarë që ende kanë frikë të na mbështesin haptas. Kjo është e kuptueshme, kur udhëhiqesh nga një pushtet i cili, nëpërmjet SHIK-ut, i rraf, i tmerron, i shantazhon, i kërrcënon ose ua humb vendet e punës atyre që nuk i kanë bindjet politike më ndryshe, ose, thjesht, nuk pajtohen me atë që po ndodh tani në Kosovë. Them e kuptueshme, duke e ditur se çka janë në gjendje këta të bëjnë për ta mbajtur pushtetin, por kjo s’është asnjëherë e pranueshme edhe duhet të ndalojë.

SHIK-u ende funksionon, edhepse ata thonë se janë shpërndarë vite më parë. Këta, ashtu qysh kanë funksionuar menjëherë pas luftës, kur vrarë intelektualë e frikësuan qytetarët deri në palcë, vazhdojnë të shantazhojnë dhe terrorizojnë njerëz deri në ditët e sotme. SHIK-u funksionon edhe për të ndarë funksione shtetërore për njerëz të Partisë Demokratike të Kosovës, duke e ndihmuar vjedhjen e votave. Më e tmerrshmja është se SHIK-u tashmë edhe është institucionalizuar dhe ka disa deputetë edhe në Kuvend të Kosovës, të cilët para pak ditësh edhe u rreshtuan si anëtarë të Kryesisë së PDK-së gjatë zgjedhjeve të tyre të brendshme.

Kreu i SHIK-ut, Kadri Veseli, pak para se të anëtarësohet në parti (me ceremoni në Mitrovicë) thotë se kurrë lidhje me PDK-në s’ka pasë më herët, kurse dy javë më vonë dalin përgjimet, ku dëgjojmë deputetin Adem Grabovci duke i raportuar atij, se çfarë ka bërë në takime në Bruksel! E ky muhabet është bërë shumë më heret në PDK, që shpalon faktin se Kadri Veseli nuk e ka thënë të vërtetën. E ky, në vend se të dorëhiqet menjëherë, shkon e bëhet më i votuari në zgjedhjet e brendshme të partisë. S’ka ku bëhet më qesharake kjo punë.

InfoGLOBI: Meqë po përmendni dorëheqjen, megjithatë duhet parë edhe anën tjetër. Deputeti i Vetëvendosjes është ai që udhëheq Komisionin për Agjencinë e Inteligjencës së Kosovës (AKI). Nëse SHIK-u është shumë i fuqishëm a do të thotë kjo se AKI-ja është dështim? Nëse SHIK-u ekziston, atëherë me të drejt shtrohet pyetja ‘çka po bën AKI’, punën e së cilës po mbikqyrë Komisioni i drejtuar pikërisht nga VV?
Ismaili: Si thashë edhe më heret, ne nuk e kemi pushtetin, që të bëjmë hetime të mirëfillta. Institucionet duhet t’i bëjnë ato. Si forcë politike në Kuvend ne po bëjmë gjithmonë më shumë se partitë tjera edhe për këtë çështje. Për AKI nuk mund të flas se a është dështim, apo jo, kur nuk i di se çfarë rezultatesh ka, meqë nuk i bën publike. Por, e dijmë se ka raste ku njerëz të SHIK-ut janë transferuar edhe në AKI.

VV në Kuvend ka kërkuar që të hetohet SHIK-u. Por, për këtë nismë nuk u sigurua ende numri i nevojshëm i nënshkrimeve, as nga opozita.

InfoGLOBI: E pse?
Ismaili: Shiko, ne kemi të bëjmë me disa parti politike, të cilat ekzistojnë menjëherë prej paslufte, apo janë krijuar pakëz më vonë, të cilat deri tani e kanë dëshmuar se i përkasin të njëjtit lloj – s’janë këtu as për të bërë politikë, e as për ta çuar vendin përpara. Këta njerëz e këto parti janë të lidhura mes vete më shumë për qëllime biznesesh e përfitimesh personale, sesa për çkado tjetër. E, kohë pas kohe i ndryshojnë vendet pushtet-opozitë, varësisht se kush ka mbetë pa pare edhe do të hyjë në pushtet me vjedhë. Prandaj këta s’pranojnë që të hetohen afera nga e kaluara, sepse të gjithë kanë frikë se mos po implikohen vetë.

Për këta çështja politike është “Do e marr pak unë pushtetin dhe pastaj e merr ti”. Madje, e kishin bërë edhe Kuvendin si shtëpinë e tyre, duke mos i respektuar as rregullat më themelore, dhe duke u tallur me të tjerët. Hyrja e Vetëvendosjes në Kuvend pas zgjedhjeve 2010, së paku e ka futur një rregull aty, me ata 12 deputetë. Sot në Kuvend deputetët e tjerë nuk munden aq lirshëm as t’i shkelin rregullat, ashtu si janë mësuar deri tani, sepse ne reagojmë. Pos asaj, Vetëvendosje ka ngritur debate për shumë çështje tjera, më shumë se kurdoherë, duke kërkuar llogaridhënie dhe duke nisë interpelanca, si ajo për Hashim Thaçin, Edita Tahirin, Mimoza Kusarin etj. Më herët debatet nuk kanë ndodhur gati kurrë.

Për shembull, mocioni i reprocitetit, të cilin e nisëm ne në dhjetor 2011, kaloi në Kuvend me vota të mjaftueshme. Ishte një fitore domethënëse. Në fund, doli kryeministri dhe i falënderoi deputetët për këtë “rekomandim’! E quajti ‘rekomandim’ vendimin e Kuvendit duke dëshmuar se, me ose pa Kuvend, Kosovën e udhëheq një diktator, i cili i injoron e i shkelë edhe institucionet më të larta shtetërore, si Kuvendin dhe Kushtetutën, pa i lëvizë syri.

Kjo tregon se, sado që mundohemi të nisim procese për të mirë, pushteti nuk zgjedh mënyra për t’i ndaluar ato, herë duke i shpërfillë, herë duke i përdorë edhe votat e partive tjera opozitare për t’i ndaluar ato procese.

InfoGLOBI: Më heret përmendët numrat e deputetëvenë Kuvend. Në vendet demokratike numrat e votave ndaj një subjekti politik, janë reflektim i përqindjes së qytetarëve që kanë preferenca ndaj tij. Me fjalë tjera, keni numra aq sa keni përkrahës, do të thoshin pragmatikët.
Ismaili: Ashtu ishte dashtë me qenë në një shtet normal! Por, në demokraci nuk vjedhen vota, e posaçërisht jo në përmasa industriale sikur në Kosovë. Si subjekt i ri politik, Vetëvendosje ka patur një sukses shumë të madh në zgjedhjet e fundit, përkundër faktit se edhe një përqindje tjetër e madhe e votave i është vjedhë. Paraqitja e deputetëve në Kuvend nuk është përfaqësim real i vullnetit të qytetarëve, falë vjedhjeve masive që kanë ndodhë në zgjedhjet e fundit.

InfoGLOBI: A keni qenë sa duhet aktiv që akuzat për vjedhje votash ti çoni deri në fund ?! Duket sikur çdo gjë ka përfunduar me parashtrim ankesash për vjedhje votash. Pse nuk jeni të zëshëm ndaj këtij problemi sic jeni bie fjala kundër bisedimeve me Serbinë, apo mbase besoni që çështjet e tjera janë më pak të rëndësishme se dhunimi i votës së qytetarit?
Ismaili: Unë mendoj se çdo problem e ka rëndësinë e edhe kohën e vetë. Edhe e di se ne kemi raportuar më së shumti raste të shkeljeve të procesit të votimit. Kemi ofruar dëshmi, i kemi dërguar ato në KQZ e institucione tjera përkatëse. Por, kur nuk kemi sistem të drejtësisë, atëherë edhe na kufizohen gjërat që mund t’i bëjmë. Prej qindra rasteve që kemi raportuar, janë dënuar pak manipulues votash. Mos harro, edhe vetë ambasadori amerikan ka dalë publikisht gjatë zgjedhjeve dhe ka thënë po ndodhin vjedhje industriale, por pak ditë më vonë, kur u shpallën rezultatet, i quajti zgjedhjet legjitime. Poashtu, edhe partitë e tjera politike i pranuan rezultatet e zgjedhjeve si legjitime, meqë edhe ata për vete kishin vjedhur, duke mos lënë hapësirë të çohet kjo çështje deri në fund.

Nuk është se ne po i japim rëndësi më shumë negociatave me Serbinë sesa çështjeve tjera. Por, këto negociata janë aktuale dhe po e rrezikojnë të ardhmen e menjëhershme të Kosovës. Duke qenë se po zhvillohen pa i dhënë asnjë kusht Serbisë, çdo takim vetëm po shkon në dëm të vendit edhe çdo ditë vetëm po e përkeqësohet situata, duke na çuar drejt bosnjizimit të Kosovës. Prandaj, është e natyrshme që, në këtë moment, kjo çështje të kërkojë më shumë hapësirë dhe përqëndrim, meqë është e rëndësishme që negociatat pa kushte të ndalojnë menjëherë.

InfoGLOBI: Të sqarohemi, çka keni ju kundër dialogimit? Kudo në botë njerëzit e qeveritë dialogojnë, pra përpiqen të ndryshojnë një gjendje status quo?
Ismaili: Absolutisht kurrgja!

InfoGLOBI: Pra, ku është problemi?
Ismaili: Ne jemi që të dialogohet. Por, me Serbinë ka kushte të caktuara dhe çfarëdo dialogimi mund të ndodhte në momentin kur Serbia ndërron qasje ndaj Kosovës.

InfoGLOBI: Është krijuar përshtypja që ju jeni kundër dialogut dhe kundër normalizimit të mardhënieve me Serbinë. Fundja pa marrëdhënie të mira ndërfqinjësore, nuk ka anëtarësim në BE, dhe kjo vlenë për të dyjat, si për Kosovën ashtu edhe për Serbinë.
Ismaili:Jo, ky perceptim është i gabuar. Ne duhet të insistojmë që Serbia të kërkojë falje për ato që i bëri në Kosovë, pastaj të paguajë dëmin që na ka bërë. Duhet të kërkohet zhdukja e institucioneve ilegale dhe dënimi i kriminelëve, si dhe të njihet shteti i Kosovës. Duhet të dijmë për fatin e të zhdukurve gjatë luftës. Ajo që po ndodh tani, është se Serbia nuk po ta njeh Kosovën shtet, nuk po të kërkon falje, nuk po t’i kthen viktimat, nuk po t’i kthen regjistrat kadastralë, e qeveria po i jep veriut autonominë! Thjesht, po negociohet në dëm të vendit dhe qytetarit, prandaj duhet ndaluar menjëherë.

InfoGLOBI: Nesër nëse Vetëvendosja e fiton pushtetin a do të takohej lideri i Vetëvendosjes me liderin e Serbisë?
Ismaili: Së pari kushtet. Ne kemi thënë vazhdimisht se me serbët nuk kemi problem, por me politikat e shtetit serb. E nëse plotësohen këto kushte, atëherë detyrimisht janë ndryshuar edhe politikat e saj.

InfoGLOBI: Përderisa VV është shumë e zëshme për pikëpamjet e saj politike, më pak dihet për qasjen e saj ndaj problemeve ekonomike. Çka mund të eksportojë Kosova, si mund ta zbutet papunësia e lartë dhe varfëria?
Ismaili: Vetëvendosja e ka Programin Qeverisës të publikuar rishtaz, i cili realisht është një alternativë qeverisëse, që mbulon tri shtyllat më të rëndësishme të shtetndërtimit: shtetin e së drejtës, shtetin zhvillimor dhe shtetin social. Ky program tregon saktë se si do ishte udhëhequr vendi nga Lëvizja Vetëvendosje, duke përfshirë çdo fushë veprimi, prej sistemit të drejtësisë dhe ekonomisë, arsimit, shëndetësisë, deri te çështjet sociale, pensionet, kultura, sporti e shumë të tjera.

Personalisht, një fushë veprimi që mund t’a ndihmojë ekonominë shumë, është “Business Process Outsourcing”, që e kam për zemër dhe mendoj se do kontribuoja në këtë çështje shumë. Më thjesht, ky është eksport “i trurit”, kryesisht në fushën e Teknologjisë Informative (TI), ku mund të krijojmë kompani të ndryshme të TI-së, të cilat kishin me i përmbushë kërkesat për shërbimet e tyre nga e gjithë bota, me cilësi të lartë dhe fuqi punëtore më të lirë.

Kjo është zhvilluar në Indi, e edhe në disa vende të tjera, duke e zhvilluar dukshëm ekonominë e vetë vendit apo rajonit ku operojnë.

Duke qenë se Kosova ka shumë popullatë të moshës së re, njohës së gjuhës angleze, të interesuar në TI dhe fuqi të lirë punëtore, me një investim të vogël kjo mundësi veprimi do kishte krijuar të ardhura të mëdha.

Kompania “3CIS”, që tash disa vjet operon në Prishtinë, duke i ofruar shërbime gjigantëve botërorë si Vodafone dhe AT&T, tashmë ka treguar se kjo është e mundur të realizohet në Kosovë. Sot i ka mbi 100 punëtorë dhe është shpallur një prej kompanive më të suksesshme në vend.

Ka edhe kompani të cilat prodhojnë aplikacione për iPhone e iPad për klientë të huaj, ose edhe shërbime tjera. Kompania ime (Ogilvy | Karrota), poashtu, ka disa klientë ndërkombëtarë.

Mendoj se kjo është një mënyrë e lehtë, e lirë dhe e shpejtë për të kontribuar dukshëm në zhvillimin e ekonomisë së vendit.

InfoGLOBI: Ju po flisni për iniciativa individuale. Shtrohet pyetja se çka po bëhet në këtë drejtim në linjë institucionale?
Ismaili: Po të ishim ne në pushtet, gjërat do të ishin shumë më ndryshe në secilën fushë veprimi, natyrisht, për të mirë. Në mungesë të vizionit dhe mbështetjes institucionale, njerëzit po detyrohen t’i shtyejnë iniciativat personale dhe të përpiqen të realizojnë ide zhvillimore edhe atëherë kur pengohen nga vetë institucionet.

Më duket se janë bërë disa përpjekje për të harmonizuar objektivat arsimore me nevojat e tregut, por në rafshin praktik nuk po ka rezultate. Në Kosovë, shkollojmë më shumë, për shembull, jurista, se që ka tregu nevojë, duke i detyruar ata të ushtrojnë profesione tjera, meqë iu duhet disi ta sigurojnë kafshatën e gojës.

Pastaj, nuk të vjen amerikani për ta bërë një investim në TI, po e zëmë, pa patur infrastrukturë. E me infrastrukturë nënkuptoj ato që tani janë esenciale për një kompani të TI-së: rrymën, internetin, sigurinë dhe njerëzit. Të gjitha këto janë të një niveli të ulët edhe shpesh individët duhet të improvizojnë duke shpenzuar në agregatë apo invertorë për rrymë, për internet të shpejtë e të qëndrueshëm dhe duke investuar vetë në trajnime të punëtorëve, gjëra me të cilat s’do të duheshin të ngarkohen.

Po të kishte pasur mbështetje institucionale dhe vizion në fushën e arsimit, Kosova do të qëndronte shumë më mirë edhe ekonomikisht, sepse këto dyja ndërlidhen ngushtë.

Herdokur që të vijmë në pushtet, e që do të ndodhë shpejt, natyrisht se çdo iniciativë do ta fillojmë institucionalisht, duke e përmirësuar infrastrukturën dhe duke e lehtësuar zhvillimin e biznesit, si për iniciativat brenda, ashtu edhe për investitorët e huaj. Për momentin nuk bëhet asgjë për këtë, sepse pushtetarët aktualë mendojnë vetëm se si të përfitojnë për vetë nga investitorët potencialë, duke i përzënë ata më seriozët, të cilët refuzojnë t’u japin ryshfete. Prandaj edhe procesi i privatizimit është një farsë e tmerrshme, në krahasim me vendet tjera që kanë kaluar në tranzicion sikur ne.

Kushdo që do të fitojë zgjedhjet e ardhshme do ta ketë shumë të vështirë të rimëkëmbë kaosin që e kanë krijuar klikat ekzistuese politiko–biznesore. Pasardhësit të Thacit, fatkeqësisht, do i mbesin ‘këmbët e arushës në dorë’, sepse do të nevojiten disa vjet vetëm për ta ringjallur prodhimtarinë, ndërtimin e fabrikave, stimulimin prodhimit dhe zhvillimit, të cilën këta pushtetarë janë duke e shkatërruar tash e sa vjet.

InfoGLOBI: Në rastin e Kosovës shumë më të artikuluara janë problemet ‘madhore’ politike, se hallet e përditshme të qytetarëve, që nuk po artikulohen sa duhet dhe si duhet. Pse?
Ismaili: Njerëzit në pushtet janë aty për t’i ruajtur interesat e tyre personale dhe nuk iu intereson për hallet e përditshme të qytetarëve, sepse vetë janë shumë mirë ekonomikisht. Madje, interesi i tyre primar është gjetja e mënyrave për të vjedhur edhe më shumë paranë e qytetarit, atë të tatimpaguesit. Ne jemi gjithherë aktivë në ngritjen e zërit për çështjet që i dëmtojnë interesat e qytetarit, edhe, me mbështetjen e vetë qytetarëve tentojnë vazhdimisht t’i vëmë në pah këto çështje, sepse, para se të jemi politikanë, jemi qytetarë të Kosovës si krejt të tjerët.

InfoGLOBI: Me protesta!!! A zhvillohet vendi me protesta politike? Kosova në të ardhmen rrezikohet nga trazirat sociale, prandaj zhvillimi duhet të jetë parësor.
Ismaili: Jo jo, përveç protestave, ne bëjmë edhe aktivitete tjera të shumëta, por si e thashë edhe më heret, në media atyre nuk u jepet hapësirë. Ato përfshijnë tribunat, tubimet e shumëta, aksionet e ndryshme, bashkëbisedimet me qytetarë edhe, më e rëndësishmja, aktivitetet në Kuvend. Ne i kemi deputetët më aktivë, edhepse jemi subjekti i tretë me madhësi.

Fatkeqcsisht, gati çdo problem në KosovC, si social apo ekonomik, po ndërlidhet ngushtë me politikanët në pushtet, duke i dhene edhe çështjeve sociale kahje politike, sepse s’mund të kesh zhvillim social e ekonomik, kur s’ekziston vullneti politik në qeveri për këtë gjë.

E, në fakt, shumica e çështjeve që Vetëvendosje i prekë janë pjesë e halleve të përditshme të qytetarëve të Kosovës. Të rinjtë tanë e shohin se në Kosovë njerëzit më të pasur janë ata që nuk punojnë, derisa prindërit e tyre, edhepse punojnë ditë e natë, e kanë vështirë të sigurojnë ekzistencën. Shohin gjyshin duke mos pasur ku të shërohet, sepse pensioni nuk ua mbulon as shpenzimet për ushqim. Shohin skamje dhe njerëz të papunë gijthandej.

Të gjitha këto janë preokupime të VV-së, me të cilat mirremi vazhdimisht. Por, në anën tjetër, në ekrane prezentohen vetëm ato aktivitete, kryesisht protesta, që paraqiten më shumë si politike, duke krijuar nganjëherë perceptimin e gabuar se Vetëvendosje, apo unë si qytetar, protestojmë vetëm për gjëra politike, e jo edhe për problemet e përditshme me të cilat ballafaqohet njeriu, që nuk është aspak e vërtetë.

Fundja, pikërisht vendimet politike të qeverisë aktuale, janë ato që po ndikojnë direkt në mirëqenien e qytetarëve, prandaj, personalisht jam poaq i brengosur me gjendjen alarmante, për shembull, në arsim e shëndetësi, sa edhe për situatën në veri apo reciprocitetin me Serbinë.

Pastaj, nuk është se vetëm Vetëvendosje proteston. Hiç më larg se sot e dje e pardje, mora pjesë në protestën kundër ngritjes së çmimeve të rrymës, një nismë nga një grup qytetarësh të përgjegjshëm, për ta përkrahur këtë çështje shumë me rëndësi që po i dëmton shumë njerëz, jo vetëm si aktivist politik, por si qytetar me faturë 3-fish më të lartë se muajin e kaluar.

InfoGLOBI: Ekziston edhe përshtypja tjetër, ajo se Vetëvendosje me veprimet e saj po pozicionohet kundër politikave evropiane dhe ndërkombëtare përgjithësisht? Sa qëndrojnë akuzat se jeni kundër ndërkombëtarëve?
Ismaili: Ky si koncept, së pari ka dal nga kryeministri Hashim Thaçi, të cilin pastaj e përdori ambasadori Dell, e dihet se ky i fundit ka qenë përkrahës i vetë Thaçit.

Dell e ka ndihmuar Thaçin në disa procese, të cilat pa të nuk do t’i përballonte. Një prej tyre është nxjerrja e Presidentes të Kosovës, Atifete Jahjaga nga zarfi, veprim ky kundër të cilit ne e ngritëm zërin, sepse, pos tjerash, ishte edhe jokushtetues. Më vonë u bë aq shprehi kjo puna e etiketimit si anti-amerikan drejt secilit që nuk pajtohej me vendimet e Kryeministrit Thaçi, sa që sot po përdoret nga të gjithë si hajgare. Natyrisht se ne nuk jemi anti-amerikanë apo anti-evropianë, dhe çdo njeri që na përcjell me pak më shumë kujdes e di këtë gjë.

InfoGLOBI: Por nuk është vetëm Delli, kemi edhe ambasadoren aktuale amerikane, Tracey Jacobson, e cila thotë që lideri i VV-së i është kërcënuar në një mënyrë edhe zonjës Medlin Olbrajt.
Ismaili:Po ajo letër ka qenë publike dhe i ishte drejtuar kompanive të cilat po aplikonin për ta privatizuar PTK-në, e jo direkt zonjës Albright. Ndodhi që në njërën nga ato kompani zonja Albright të ketë aksione. Pra letra të cilës i referohej Ambasadorja Jackobson ishte publikuar nëpër emaila e rrjete sociale disa muaj më herët, dhe askujt nuk i është dukur atëherë si kërcënim pjesa ku thuhet se “nëse shitet PTK-ja në këtë mënyrë, ndodh që njerëzit do të dalin në protesta”. Edhe s’është hera e parë që është protestuar kundër shitjes së PTK-së. Ne nuk kemi thënë se ‘nëse vjen zonja Ollbrajt në Prishtinë ne do të dalim në protesta’, e as nuk e kemi kërrcënuar në ndonjë mënyrë tjetër, por Ambasadorja si duket e ka keqkuptuar. Ku e di, mbase ia kanë përkthyer përmbajtjen e letrës keq.

InfoGLOBI: Pikërisht kjo ishte pytja pse ju nuk keni qasje me ndërkombatërët kur partitë tjera opozitare kanë?
Ismaili: Ne kemi qasje, por jo aq sa ka qeveria, duke qenë se jemi subjekt opozitar. Ne mbajmë takime të rregullta me ndërkombëtarë. Vitin e kaluar ka qenë ambasadori i Anglisë tek ne, ai i Gjermanisë, e shumë të tjerë që kanë takuar Albinin dhe Shpendin. Liderët tonë vjet ishin dy herë në Bruksel dhe janë pritur shumë mirë. Në Bruksel, madje, gjatë takimeve me zyrtarët e BE, i kanë pyetur se a janë në dijeni se sa shahet VV-ja nga zyrtarët e Prishtinës. Qeveritarët, si duket, po kalojnë ma shumë kohë duke na demonizuar neve sesa duke punuar për Kosovën. S’ka thënë kot Adem Grabovci në përgjimet e Pröntö aferës “Ua silla e ua pshtilla”, sepse këta mbarë s’dijnë ta bëjnë asnjë gjë.

InfoGLOBI: Nëse në politikat e Bashkimit Evropian preferohet privatizimi, nëse në politikat e BE-së preferohet fqinjësia e mirë, nëse preferohet qarkullimi i lirë i mallrave, i njerëzve, i ideve dhe i kapitalit, e ju në vazhdimësi i kritikoni 4 liritë fundamentale të BE-së, atëherë edhe pa ju sharë, do të percpetoheni si anti –perëndimorë. A jeni të tillë apo nuk jeni?
Ismaili: Natyrisht se nuk jemi anti-perëndimor, edhe as nuk kundërshtojmë qarkullimin e lirë të njerëzve, mallit e kapitalit. Thjesht, duam që këto të veprojnë në funksion të vendit, e jo xhepave të qeveritarëve edhe disa ndërkombëtarëve. Nuk zhvillohet vendi duke iu nënshtruar ndërkombëtarëve, por duke krijuar bashkëpunim të mirëfilltë dhe duke punuar si partnerë.

Pra, përveç tjerash, duam trajtim të barabartë me ndërkombëtarët, bashkëpunim, dhe jo nënshtrim, sikur ky me qeverinë aktuale. Të shitet distribucioni i KEK-ut për 26 milionë euro, kjo nuk është privatizim, por hajni e madhe, që tani po reflektohet edhe në faturat e rrymës.

Jemi kundër privatizimit që nuk është në kuadër të një strategjie për zhvillim ekonomik. Privatizimi është instrument, dhe jo qëllim. Qeveritarët, duke mos ditur më shumë, flasim për privatizim, derisa Vetëvendosje flet për zhvillim, që është dallim i madh.

InfoGLOBI: Zyrtarët qeveritarë, në anën tjetër po thonë se ata kanë bërë më të mirën të mundshme sa i përket KEK-ut. Sipas tyre askush nuk ka sjellur ndonjë blerës që do ta blente KEK-un për çmim më të lartë nga ai që është shitur. A keni gjetur ju ndonjë blerës më të mirë?
Ismaili: Nuk e di saktë, por jam shumë i bindur se ka patur edhe blerës, si po thuani ju, “të mirë”, por unë ju siguroj se qeveria nuk do ta lejonte që një kompani të tillë ta blejnë njerëz jashtë grupeve të tyre të interesit. Hiç më larg se para ca ditësh, një shok më tregoi se bashkë me disa blerës anglezë kanë dashur ta privatizojnë një objekt me një çmim ofertë koxha të lartë, por meqë ata nuk ishin njerëz që korruptohen dhe nuk pranuan të japin ryshfet, zyrtarët e anuluan tenderin në tërësi, sepse nuk kishin si ta anashkalonin ofertën e dhënë.

Tek KEK-u, jam i bindur se ka marrëveshje të fshehtë. Nuk besoj se është rastësi që KEK t’i shitet për 26 milionë euro Limak-ut, pikërisht kompanisë të cilës iu dha me koncesion aeroporti i Kosovës. Secili nga ne duhet të pyetet, se pse nuk u fut në tregun kosovar ndonjë kompani tjetër e madhe? Unë nuk e përjashtoj mundësinë që pas blerësit “zyrtar” të distribucionit të KEK-ut, qëndron dikush nga banda mafioze, që ka futur para për aksione dhe është bashkëblerës i distribucionit për 26 milionë euro, e që pas një apo dy vitesh ta shesë të njejtën shumëfish më shtrenjtë. Kjo ka ndodhur me tokat për autostradë, kur plot zyrtarë kanë blerë tokë me çmim prej 10 euro ari, e sot të njëjtën ia kanë shitur shtetit për 1000.

InfoGLOBI: Po tek qarkullimi i lirë i mallrave, i produkteve, i njeriut, i ideve?
Ismaili: Qarkullimi i lirë i mallrave duhet të mbështetet mbi bazat e reciprocitetit. Shumë e thjeshtë është kjo punë. Ne jemi për të drejta të barabarta për të gjithë, për bashkëpunim me Evropë e Amerikë, por jo të bëhemi servil i tyre. Çka po shohim tash është një lloj nënshtrimi ndaj ndërkombëtarve, që po e dëmton mirëqenien e qytetarëve dhe të vendit.

Natyrisht se ndërkombëtarët do t’i shfrytëzojnë njerëzit e manipulueshëm, sikur bandën e Thaçit, për interesat e tyre derisa të kenë mundësi. Por, kjo dikur duhet të ndalojë, meqë në BE nuk mundemi të hyjmë kështu të pabarabartë. Prandaj, me Thaçin në pushtet nuk do të hyjmë në BE kurrë, se BE s’i lejon kriminelët të jenë pjesë e saj.

InfoGLOBI: Çka po ndodhë kështu me diskursin publik, me gjuhën dhe mënyrën si po komunikohet. Shumë akuza e kritika po bëhen me lehtësi? Ku po ngelet përgjegjësia e fjalës?
Ismaili: Nëse më pyet mua, kur ke të bësh me mafiozë në pushtet, çfarëdo gjuhe që të përdoret drejt tyre nuk është mjaft e ashpër, posaçërisht kur i mbron qëndrimet edhe pikëpamjet e tua. Në krahasim me çka po i bëjnë këta njerëz Kosovës, sjellja ndaj tyre, madje mendoj unë, është e butë, kur edijmë se ata duhen të jenë në burg, e jo në pushtet. VV nganjëherë mund të tingëllojë ashpër, por jo ofendues. “Ofendimi” më i madh që ka mundur të bëhet, është (ofendim po e quaj kushtimisht edhe pse nuk e konsideroj si të tillë) kur Albini i ka thënë Hashim Thaçit “mos u zgërdhij”, në një moment kur vërtetë Hashim Thaçi zgërdhihej në një situatë shumë serioze.

Ky pushtet vazhdimisht ia ofendon qytetarit punën, inteligjencën e dinjitetin, dhe si rezultat s’është çudi që ato u kthehen me fjalë të rënda edhe nga vetë qytetarët.

InfoGLOBI: Ofendim është edhe kur në foltore të Kuvendit dëgjohen akuza që i drejtojnë deputetët njëri tjetrit, apo ua adresojnë ministrave dhe e kundërta. Kjo mënyrë e komunikimi i hedhë kritikat e akuzat në terren spekulativ, nëse ato nuk mbathen me fakte dhe ngelin vetëm në fjalë. Fundja në demokraci krahas lirisë së shprehjes ekziston edhe përgjegjësia e secilit për atë çka folë apo deklaron.
Ismaili: A e ke fjalën për deputetët e Vetëvendosjes tani?

InfoGLOBI: Po, edhe për deputetët e Vetëvendosjes. Kuvendi është shndërruar në terren fyerjesh reciproke.
Ismaili: Shiko veç sa skandale i pati Ministria e Punëve të Brendshme në muajt e fundit. Çka tjetër me iu thanë, pos se janë hajna e kriminelë? Po vidhet ari, po vjedhet dhoma e dëshmive në mes të ndërtesës së policisë, e po keqpërdoren tendera. Ku mos me iu thanë kriminelë? Policia e Bajram Rexhepit po rraf qytetarë e deputetë pa pikë arsyeje, e ju po folni për gjuhën, duke i anashkaluar veprat e atyre, për të cilat po akuzohen. Të gjithat akuza që kanë bazë edhe dëshmi.

Pastaj, a i keni ndëgjuar përgjimet, se çfarë gjuhe vetë pushtetarët përdorin? Kur e quajnë elektoratin e tyre “zagar”, atëherë imagjinoje se çka mendojnë për të tjerët, derisa para publikut “shiten” si engjuj.

InfoGLOBI: Po, dikush do të thoshte se edhe ju në faqen e juaj të Facebook-ut po përdorni një gjuhë të rëndë!
Ismaili: Unë nuk jam as i përzgjedhur i popullit, as në ndonjë pozitë publike, veçse një qytetar i rëndomtë, ndoshta pak ma aktiv se të tjerët, që i shpreh mendimet e veta personale, në këtë rrjet social. Facebook-un po e shoh si mediumin e vetëm sot, që të lejon të shprehesh lirshëm, duke qenë se në një mënyrë ose tjetër mediat tradicionale po cenzurohen vazhdimisht. E, 37,000 njerëz nuk janë abonuar në faqen time sepse jam i bukur, por sepse iu interesojnë temat për të cilat hapi diskutime dhe debate, prandaj aty edhe ka shumë aktivitet.

E vertetë se nganjëherë shprehem më rëndë se që jemi mësuar të lexojmë, por asnjëherë nuk them më shumë se çka thotë secili, së paku 3-4 herë në ditë, kur shan për gjëra të ndryshme, meqë flas për tema të përditshme që na prekin të gjithëve.

Me e kqyrë hollë e hollë, së paku unë edhe shaj publikisht, e jo pas shpinde, sikur këta të aferës së përgjimeve “Pröntö” edhe besoj se, pavarësisht ndonjë fjale më vulgare që mund ta lëshoj, njerëzit e vlerësojnë sinqeritetin edhe drejtësinë nëpër statuset e mia, sepse e dijnë që gjthmonë e bëj për të mirën kolektive.

Profili im në Facebook është personal, edhe duhet të trajtohet si i tillë, ngase në të nuk i paraqes qëndrimet zyrtare të subjektit politik që i takoj, por e shprehi mendimin tim, i cili i përkrah ato qëndrime, dhe njëkohësisht e ushtroj të drejten time të shprehjes së lirë.

InfoGLOBI: Kur do të mbahen zgjedhjet?
Ismaili: Sivjet po shpresoj!

InfoGLOBI: Si e sheh skenën politike?
Ismaili: Nëse nuk vidhen votat, e shoh shumë mirë. Te ne ka rritje dhe përkrahje të vazhdueshme për çdo ditë. Por, nuk është edhe aq e lehtë të ndalen hajnat. Nëse njerëzit janë me të vërtetë të pakënaqur ashtu si po i shoh unë, dhe si po ndihem vetë, atëherë i shoh dy mundësi: nëse nuk e largojnë pushtetin me protesta masive, atëherë duhet ta bëjnë këtë me anë të votës. Hajnat hiqen lehtë nga pushteti vetëm nëse të gjithë qytetarët bëhen bashkë dhe ua tregojnë vendin, sepse Qeveria duhet të jetë në shërbim të qytetarit, e jo anasjelltas.

InfoGLOBI: Por, njerëz të shumtë nuk janë të kënaqur as me subjektin e juaj politik. Njeriu po ndjehet i lënë anash, i harruar nga të gjithë. Ai do paga të mira, rrymë, ujë, shërbime mjekësore cilësore dhe gjëra tjera që afektojnë jetën e tyre të përditshme.
Ismaili: Për t’iu përkushtuar qytetarit ashtu si duhet, ne duhet të jemi në pushtet. Disa gjëra, thjesht, nuk mund t’i realizojmë si subjekt opozitar me 12 ulëse në Kuvend. I takon pushtetit të punojë për mirëqenien e vendit, ndërsa opozitës të reagojë kur ata nuk e kryejnë punën si duhet. Ne këtë pjesë po e bëjmë shumë mirë.

Unë Vetëvendosjen e shoh si të vetmin subjekt që në asnjë mënyrë nuk e lë qytetarin anash dhe të harruar, edhe çdo ditë e më shumë qytetarët po e shohin se ne jemi të vetmit që ua përfaqësojmë interesat.

Nuk është e lehtë kur e shoh se prej neve janë pritjet ma të mëdha se prej këtyre që janë në pushtet, e pastaj vetëm një xham po ta thejmë, kritikohemi më shumë se një qeveritar që vjedhë qindëra mija euro të tatimpaguesit çdo ditë. Por, për ta demaskuar hajninë që ndodh prapa xhamave, ndonjëherë duhet sakrifikuar ai xham. Ndryshe nuk largohen këta nga pushteti.

InfoGLOBI: A po përgatitë Vetëvendosja ndonjë befasi për 2013-ën nuk kuptimin pozitiv zhvillimor?
Ismaili: Po! E para, dhe më e bukura, është alternativa qeverisëse e Lëvizjes Vetëvendosje!, e cila është përfunduar dhe miratuar. Në këtë program qeverisës, që nuk e ka asnjë parti tjetër politike, shumë qartë tregojmë se si do të udhëhiqet shteti me ne në pushtet. Kjo poashtu e dëshmon se ne jemi politikbërësit e vetëm në skenën aktuale politike, e nuk jemi pazarxhinj si të tjerët. Për ne gjithmonë është primar shtetndërtimi edhe mirëqenia e qytetarit, e asnjëherë llafet e kota, mospuna dhe hajnia.

InfoGLOBI: Pra po i ktheheni njeriut dhe halleve të përditshmërisë së tij?
Ismaili: Ne gjithmonë kemi qenë edhe do të vazhdojmë të jemi me njeriun dhe hallet e përditshme të tij. Në momentin që një pushtet largohet nga njeriu, ai është pushtet i dështuar. Duke i parë të gjitha partitë prej paslufte duke e bërë të njëjtën gjë, ne jemi të sigurt se kemi mësuar nga gabimet e tyre dhe se nuk do të gabojmë si ata asnjëherë.

Në fund të fundit, vota vendos se kush e merr pushtetin,e koha është që politika e vjetër të largohet dhe të zëvendësohet me një alternativë të re. E Vetëvendosja është alternativa e vetme.

InfoGLOBI: Që nuk do të thotë se nesër nuk do të ketë aleternativë tjetër.
Ismaili: Mund të ketë, por rruga për t’u futur në politikë është e gjatë edhe e mundimshme, posaçërisht nëse do të bësh ndryshime, e këtë po e përjetoj në lëkurën time. Do të ishte e mrekullueshme sikur të dilte një alternativë tjetër, poashtu e shëndoshë, që t’i largonim këta harrangopat e politikës së vjetër një herë e përgjithmonë nga skena. Atëherë do t’a kishim një Kuvend me politikbërës të mirëfilltë, sepse këta aktualët bëjnë gjithçka, vetëm politikë s’bëjnë.