BE: Për sundimin e ligjit s’mjaftojnë vetëm zotimet
12 / 02 / 2013, 16:16
Sot Kosova dhe BE-ja janë takuar për herë të dytë në kuadër të Dialogut të Strukturuar për Sundimin e Ligjit.
Ky takim i dytë i mbajtur në Prishtinë është përqendruar fillimisht në prioritetet e sundimit të ligjit të përcaktuara nga Studimi i Fizibilitetit për një Marrëveshje të Stabilizim Asocimit në mes të BE-së dhe Kosovës.
”Forcimi i sundimit të ligjit është në qendër të procesit të zgjerimit të BE-së, prandaj edhe është qenësor për progresin e Kosovës drejt Evropës. Dialogu i Strukturuar për Sundimin e Ligjit është një instrument i rëndësishëm që na mundëson t’i ndihmojmë Kosovës në fuqizimin e gjyqësorit dhe ta mbështesim atë në përpjekjet për ta luftuar korrupsionin dhe krimin e organizuar. Sot, unë e kam mirëpritur zotimin e qeverisë për të siguruar se prioritetet afatshkurta për sundimin e ligjit të Studimit të Fizibilitetit do të plotësohen së shpejti.
“Në mënyrë që Kosova të ecë para drejt integrimit evropian, institucionet e saj duhet të tregojnë nivel të lartë e të vazhdueshëm të angazhimit politik për të bërë reforma të nevojshme, dhe për të arritur rezultate sa i përket legjislacionit, implementimit dhe fuqizimit. Veprat flasin më shumë se sa fjalët”, tha Joost Korte, zëvendës drejtor i përgjithshëm në Drejtoratin për Zgjerim në Komisionin Evropian.
Takimi i radhës i Dialogut të Strukturuar për Sundimin e Ligjit është planifikuar të mbahet në shtator.
